judgment-seat-of-christ

THUMAKAI

Hiche leiset hi, Christa hungkit teng, athu atan’a asuhmang ding tahsan chate eiho jousen ihesoh keiyuve. Pathen, ama atheng ahijeh chun, hiche leiset’a athenglou, aboh jouse thu atanding ahi. Ahin Pathenin thu atanding chu thudih lamcheh’a ahi (Rom.2:2).

Pathenin phat masalaiyin jong thutanna ana neiye. Phat bihkhat chun Lucifer le anungjui vantil chonse ho thu ana tanin ahi (2 Pt. 2:4; Jude 6). Khang gilou mite, Noah phatlai chun, Pathenin athu’u ana tannin, twi sanglet’in gotna anape’e (Gn.6-7). Babel innsang saho thu atanin apaovu ana suhkhen peh’e (Gen.11:1-9). Sahlam (Northern) gamkaiya cheng Israel mite thutana ananeiyin Assyria gama a tolmange (2 Kg. 17:1-6). Lhanglam (southern) gamkaiya cheng Judate thu ana tanin, Babylona soh’in atolmang’e (2 Kgs. 25:1-12). Houbung sunga Ananias le Sapphira thina chanin athu lhon ana tan’e (Act. 5:1-11).

Ahung lhungding khanga jong Pathenin thutanna aneiding chu gotsa um ahi. Revelation bung 6 -16 sunga Pathenin tribulation teng vannoi chonset jeha thutanna (sinkhana sagi) aneiding mudoh ahi. 2 Corinthian 5:10 ivetleh, Christaa thi ho thokit (rapture) teng athu’u bema mun’a kitan ding ahi. Hiche thutanna hi chonset jeha gotna peh ding hilouvin itobang kipaman asanthei ding ham tia anatoh dungjui cheha thutanna joh ahi. Matt.25:31-46 sunga, tribulation kichai teng Pakai Christan Vannoi namtin thu atan ding chu muthei ahikit’e. Hiche a thutan nading chu, Gentileten Israelte iti anabol uvem, hiche dungjuiya chu Pathenin Gentilete chungthu atan ding ahi. Paul’in tahsan chate eihon, vantil ho thu itandingu jong ana seiye (1Cor.6:2-3). Chukitle Laltouna Kang Thutanna umkit ding ahi (Rev.20:11-15). Hiche’a athu kitan ding hochu khang jousea michonse ho, Pakai Jesu tahsan lou ho chule Kum Sang Lenggam (millinium) kichai lam’a hung chonse ho jouse tonsot damun meidila dinga thutanna um ding ahi. Pan, Chapa chu thutan chaina, thutanna apeh ahijeh chun (Jn. 5:27) Chapa anga mijouse thu kitan ding chu gotsa ahi. Jesu Christan a-Pa loupina a avantilte toh ahungteng mi jouse, athilbol dunjui cheha athu atan ding ahi (Matt.16:27). Mihemte dia khatvei thia chujou teng Pathen thu tanna anga din ding chu gotsa ahi (Heb. 9:27).

Achunga thutan na kisei ho jouse laha BEMA kiti Christa Laltouna Anga Thutanna pen hi, hiche lekha jolin asei nom ahi. Hiche thu tanna chu thi le hin chungchang ahiloule damun or vangam jotna dia thutanna ahipoi. Hiche Thutanna chu judicial banga themmo chansah ding ahilouleh suhkhel/chonset jeha gotna pehna ding jong ahipoi. Ahin kichep golseh (sports) got chom chom a hatman jatchom chom aum banga, tahsan chaten atoh dungjui cheha seiphat nale itobang kipaman asan thei ding ham, tia thutanna joh ahi. Hiche thutanna chu tahsan chate, huhhingsa ho thutanna ahi. Chuni teng mitinin tahsaa athilbol apha hile, ase hile, athilbol dungjui cheh a atohman asan cheh theina dinga, tahsan chate jouse Christa thupi tanna anga chu kilah cheh ding ahi (2 Cor.  5:10).

BEMA UMDOL LE KIMAN DAN

Bema hi Greek verb “baino” akon kilason ahin, akoudoh chu, “kaltou or chetou” tina ahi. Hitia chu mun kido sangjep a (platform), kalbi (step) kido a kikal tou ahi. Chuleh Pnyx tia kihe, Athens miten munsang/leibou (molneo/lhemlhung tobanga bohdoh), khat a ‘dan le mol’ ho asem jitengu, ana kikhopnao mun seinaa jong kimang ahi.

Bema hi masanglaiya Greek ten Athens muna mun adokhang uva, chutia chu thusei pa mijousen amutheiya athusei ajahtheina ahi. Judate paovin Bimah akitin, Syngagogue a akikhop tengu leh Torah anasim najiu pulpit kiseina ahikit’e. Masang chun hiche bema chu song (stone) hon anasem jiuve, ahin tukhangin thingpehin/cement’in ikisemun chule akaldoh nading kalbi (steps) jong ikisem’uve.

Classical Greek a kiman dan

Bema kiti thuchang hi Homer (6th/7th century laiya Greek te jilkung minthang khat) phatlaiya kona hung kimangcha pan ahi. Classical Greek a kiman dan chu ahile song kidokhanga pulpit a kimang, ahiloule mun kikhang sangdiu khat a lamkai hon mipi anga thusei naa amanu, ahilou jongle thutan vaihompan thutannaa aman na mun chu seinaa kimang ahi.

Septuagint[1] a kiman dan

Thulhun Lui Greek paova kiledoh Septuagint chun bema kiti thuchang hi nivei akimang’e. Pulpit ahiloule thingpeha kisem platform chule keng chotpha namun seinaa kimang ahi. Vetsahnan, Nehemiah 8:4, “Hichun mihon thusei mun dinga asem mong mongu thingpeh kido sang (bimah) chung khat’a hin Ezra danthu lekha thempa chu adingin…”  chuleh Deuteronomy 2:5, Pathenin, “Amaho hi toh kina hih hel’uvin; ajeh chu keiman amaho gam khu them’a them cha jong nang ho kapeh lou diu, chotpha (bimah) kham kengpeh thol jeng cha jong kapeh louhel ding nahiuve…” atin ahi.

Thulhun Thaha kiman dan

Bema kiti thuchang hi Thulhun Thah a som le ni (12) veijen akimang’e. Mun ni hin eschatological[2] lampang aseiyin chule mun som a vang achesa phat (past tense) among in ahi. Eschatology chungchanga kiman na teni chu 2 Corinthians 5:10[3] leh Rome 14:10[4] ahi.

Solchah 7:5, bema hi keng ngapna (step) tin amangin, chuleh Solchah 12:21 chun thusei ho thusei namun tin amang kit’e.  Chuleh adang get (8) Thulhun Thaha kimu ho jouse hin thutanna munin aseisoh keiyuve. Vetsah nan, Matt.27:19, “Chuin ama thutanna muna (bema) atoupet’in ainneipin thu ahilhan….” Chuleh chang 26 nan, “Chutah’in aman amaho chu Barabbas alhadohpeh-in, Jesu vang chu ajep’in thingpela akhetbeh dingin apedoh tan ahi.”

            Chuleh bema kiti thuchang hi, Gallio, Festus le Caesar anga Paul in, a thu kitan dinga, adin seinan jong akimangin ahi. Solchah 18:12, “Ahin Gallio chu Achaia a gamvaipo ahi laiyin Judaho lung khat akisauvin Paul bolnan akipatdoh-un, thutanna muna (bema) akaiyun” (cf. vv.16-17). Chuleh Festus le Caesar thutanna anga adin ding Paulin angeh dan Acts. 25:6, 10, jong akimun ahi.

Bema umdol hi achomlam pena seidingin amun le aphatin apoh ahi, ahin alhangpin kalbi, touna/dinna mun kido khang jep, mi thupi hole mi loupi ho japi laha amun’u, chule thutanna mun, ho seina a kimang ahi.

GREEKTE GOLNOP/GOLSEH

Greekte golnop a, golseh lamkai ho touna chuleh golseh kichemho vetsui naleh ahat ho kipaman peh na mun chu bema tia het ahi. Paul’in hiche vetsahna anapeh (1 Cor. 9:24-27; 2 Tim. 2:5; 4:7-8) ahijeh chun hiche Greekte kichep golseh chungchang hi het teiyin apha e.

Golseh ana umdan

Corinth Houbung mite Paul’in lekha athot masat chun hiche phatlaiya mijousen ahet sohkei thilho amangchan ahi. Vetsahnan, 1 Cor. 9:24-27 sungin Isthmian kiti kichep golseh amangcha e. Hiti hin Paulin lhagao thu ho hetthei nading chun tahsaa thil hetho mangchan ahil chen e.

Solchah Paul phatlai chun Greece gam hi Romete letna le vaipohna noiya um hijongle Greekte chon le khan vang abang ahijenge. Hijeh chun golseh lampanga Greek le Roman in jatchom cheh aneilhon’e. Victor Pfitzner in, “Greekten kichep golseha, asunga kichem ho goh hilouvin apolanga vehon jong athanei sun ule abolthei chanun akichem ho panpina le tosotna anei jiuve. Alangkhata Romete “Ludi” [golseh]… hitobang chu ahipoi. Aveho chun thisan naisan puma kidal (gladiator) chu noptahin, agalvet thouve,” atin ahi.[5]

Samuel L. Hoyt in, Panhellenic (Greek nampumpi) kichep golseh jat li, (Olympic, Pythian, Isthmian le Namean) ho umdol hiti hin aseiye:

Olympic le Pythian golseh hi kumli jousehin aumin; Isthmian le Namean teni hi kum ni seha um ahi, chuleh Isthmian chu Olympic le Pythian kumto akitohjin ahi. Vetsah nan, 396 BC bang chu Olympic le Isthmian um, 395 BC a Namean, akumkit 394 BC a Pythian le Isthmian um, hitia chu akum kuma golseh jatli hohi aneijingu ahi. [6]

Isthmian golseh chu kumni sehleh Corinth khopia umji ahijeh chun Corinth khopia Christian jousen hiche golseh chu ahetsoh teidiu ahi. Hiche golseh chu Poseidon[7] kiti twikhanglen pathen (the god of the sea) janaa kibol ahi. Paul, Corinth khopia lha som le lhaget/kum khat le akeh jen (Acts 18:11) avaitham sunga hiche Isthmian kichep golseh hi agavetkhah teiding tahsan ahi. Hiche golseh hi phalbi kichai jou ahivanga nipi/sat kipat masang (spring season) laiya umji ahi, abang komle April ahiloule May lhabul langle a umjie.

Paul’in Isthmian golseh agamu mong hinam ti hetthei nading chun, Corinth khopia a umlai phat chu suitoh lou akhoh e. Gallio gamvaipo ahilaiya um ahidan Acts 18:12 sungin akimun ahi. Bible them hon asei dungjuiyun Gallio hin July lha AD 51 kuma gamvai ahinpoh pan ahi atiuve,[8] abang loikhat chun AD 52 July lha joh ahi atiuve.[9] Hoiche pen chu hijongle, Paul, lha som le lhaget jen um ahijeh chun hiche kumni seha kimang Isthmian golseh hin alapdan teiding ahi. Conybeare leh Howson in hiche golseh a Paul agajao ding chu “tahsan um mama ahi” atilhon’e.[10] Hiche bang chun A.T. Robertson injong, “Paulin hiche kichep golseh chu amujing ahi” tin aseiye.[11]

Alangkhata, hiche kichep golseh chu Paulin agavet a konna ahet ahiding chu Eric Sauer anom hih e. Aman asei chu:

Christian masa hon Pathen houlou ho golseh umdan hole chondan ho ahet’u ahijeh chun, agavet uva kon a ahet’ u ahi kiti chu ahiloubeh ding kisei ahi.  Adehin Paul chu Jesu Chrsita akisan masang jenga jong hitobang golnop a agalhah ding chu ahithei lou ding thil ahi. Ajeh chu Paul chu Jew ahina chung chona Pharisee mi ahi, amaho ding chun chutobang golseha galhah ding chu nasataha danin akha ahi.[12]

Hitobang golseh, saguhkeova kichepna hohi Jewsten aga vetlou heldiu ahi tin Pfitxer in aseiye, hiche golseha a kichem ho hihen chule akichuh ho hile sagohkeo a aboljiu ahi.[13] Hiche golseh’a chun Paul agajao monge tia Bible’in aseilou jehin, Paul agajao jeha ahet ahi tithei ahi poi, ahin hoiche chu hitaleh Paul’in hiche golseh chungchang hi ahetchet mama vang ahi.

Golseha jaoding mi lhinjidan

Isthmian golseh’a kichepna jatchom chom hochu; kilhaitet, sakol kilhaitet, sakol kangtalai kilhai tet, kungkal, kibot, kisuh (boxing), songpeh se (discuss throw) chuleh tingcha kho kitet, hohi ahi. “Lhaitet golsehnaa khu mi jouse lhaicheh jia ahi, ahivangin khatbouvin hatman asangjin ahi. Chule kibot ima hijongle golseh jouving, tia guttena cu ati chunguva atibah-u ijakaiya atimhat jiuve. Amaho chun lallukhuh kem mangthei lonaa abolu ahin, eihovang kem mangtheilou lallukhuh loa ihiuve” (1 Cor.9:24-25).

Hiche golseha jaothei nading chun angaicha thil alou theilou aum’e. Amasapen a, ama chu Greek mi hi ding (ajeh chu chiding namdang jaoding danin aphallou ahi). Chuleh soh hilou chamlhat mi hi ding. Mijou mijong, dan po mi hilou ding, amavang nolnabei mibou jaothei ding ahi. Hitia chu a gam mi, chamlhat mi, chuleh hinkho theng mang mi, chujongle tahsa lama hatna le thepna nei mi ho bou pangthei ding ahi.

Golseh a jaoding miho chun lhasom kichuhna anei masat ding. Neh le chah nasa taha kitimding chujongle tahsa kichuhna nasataha aneiding ahi. Samuel L. Hoyt in neh le chah chungchanga Epictetus sei chu hitin alason’e, “kitup taha hinkho naman ding, bu geochao taha naneh ding, alhum ima naneh louding, aphatcha exercise nabol ding, dap le sat hihen, twi dap nadon louding chule khamna thei ima nabol louhel ding ahi.”[14]

Chutia kichuh na jouse ahin chaisoh uva, golseha jaothei ding dinmuna aumtengu le, a pathen’u lim masanga, dan jouse ka kichuh themsoh keiyin, golseh kichuh na jouse jong kachai soh keiyin chule dan jouse ka juisoh keiding ahi, tia kihahselna anei masat kit ding ahi. Greekte golseh (athletics) le a hou’u (religion) kisamkai dan Gardiner in hitin ana seiye:

Kichep golseh hochu a pathen’u janaa kibol ahi, chuleh hichea hatman sang ho chun pathen achunga alunglhai jeha goljona aneiyin akigel jiuve. Chujongle hiche kitetnaa jaohon golseh dan palkeh, adeha jou le nal, lunghthim phalou keng chu pathen jabollou chule pathen lunglhaina ahipoi tia agelu ahi. Hitobang lungput aneijeh uchun Olympia golnop chu mundang danga sangin athengin, akitupin chule ahoipenin ahi.[15]

Hiche ho jouse jeha Paulin Timothy henga, “Chule golseh kitetna jenga jong khattouvin gol jo na dingin kihabol nama jeng jong le dan ngaitaha abol loule, lal lukhuh akhujji poi” (2Tim.2:5) anati ahi.

Golseha thusamle (herald) pa

Greekte golseh umdola chu hiche thusam le pa hin a lamkai ahi. Hitia chu akitet ding miho chu, amin le ahung kondohna khopi min, japi mai a aphongdoh masat ji ahi. Samuel L. Hoyt in hiche chungchang a Thomas Horne thusei anoiya bangin alason’e:

Thu sam le pan amincheh uvin akouvin, dan ho asimlhah peh jin, hataha athaneina pumpia pan a laha goljona aneithei nadin atilkhoujie. Chujou teng kitet nading stadium muna ahin puilutjin, adin kolsah jin, o’ging tahin, mipi ho henga asamin, hiche holaha hi koi tobangin, jaothei ponte, amahi soh ahi, mi kituplou ahi, gucha michom ahi, danpo mi ahi, chidang namdang mi ahi, ti he naum ule hinseiyun atijin ahi. Chujouteng maicham masanga adinsah jin, hiti chun lunglhaisel le kipah taha dan jouse kanit sohkeiya, ka juisoh keiding ahi, tin akihah selsahjin ahi.[16]

Golseh kichai teng, ahat ho, goljona neiho chu hiche thu sam le pan, apa min, chuleh ahung kondohna khopi min puma ahin phondoh thaji ahi. Hiche thu sam le pa vetsah nahi Paulin Corinth houbung mite lekha athot masat a chu, “Kati hi kachup kachupjia kathua kanunsah ahi. Achuti loule midang ho henga thu saple/kahille nungle ajole keimatah ijemtin lah louvin umkhange,” (1Cor.9:27) anapeh ahi.

Golseh thutan (judges) ho

Greekte golseha thutan hochu nolnabei mi, mi kitah le tahsan naa dim jeng mi ahiuve. Hiche thutanna pang ho chu alhangpin mi som le ni chan ahijiuve, ahin BC 348 jouva konin mi som chanbou ahi jitauve.[17] Amaho cheng chun phataha dan ajuisoh keiyu hinam tia avetsuiyu ahi. Dan sukhel chu itobangin hat nale thepna neijong le hatman sangdia lhingthei lou ahi.

Thutan ho chun pon san dup akivon jiuve. Kichep golseh kichaisoha, thu sam le pan goljona neipa ahinphondoh teng, hiche kipaman sang ding pa chu, thutan ho (judges) ang, bema muna chu hatman lallukhuh sangdinga dingji ahi. Hitia chu thutan hochu a pathen’u panmun a panga hatman lallukhuh chu ahopdoh jiu ahi.

Golseha hat man       

Golseh jatchom choma goljo na neijouse kipaman kipe sohkei ahi. William Smith seidanin, “Solchah ho phatlaiya hatman ana kisem dan chu ahile thingdo ho akola kipheh’a alu uva kikhuh peh ahi. Olympia chun Olive do akimangin, Namean a parley do (ado kohlen, apah kang) akimangin, Puthia golseha laurel thingdo akiamgin, chuleh Ismhmian golseh a fir thingdo akimang’e.”[18]

Isthmian golseha hatman chu fir (chah thing tobang) doa kisema hichu goljona neiho kikhuh peh ahi. Hiche chu tukhang banga sanaa kisem ahiloule man tam tah taha kisem trophy hobanga manlu jong ahi poi. Ahin mihon hiche thingdo chu velouvin, agoljona min pa joh chu aveuvin angaisang uve. Paulin tahsan chaten kem mang theilou lallukhuh isan diuto tekah hoi ahiloudan tekahna apeh chu ahi. “… Ama ho chun lallukhuh kem mangthei lonaa abolu ahin, eihovang kem mangtheilou lallukhuh loa ihiuve” (1Cor.9:25).

Golseh kichaiyin, hatman sangin minthang tahin a inn lam akile tan ahi. Inn akile a akhopi alhun teng, a lallukhuh san chu, a pathen anga aselhah jia, thangvah nale loupina apathen apeh ji ahi. Solchah John in Thuphon bung li sunga, laltouna toupa anga upa som ni le li hon a lallukhuh’u aselhah jiu gaovin ana mun ahi. Thuphon 4:10-11 sungin hitin ana sundoh e:

Chule laltouna kimvela chun laltouna som ni le li aumin; hiche laltouna ho chunga chun ponbang kisila alua sana lukhuh kikhuh upa som ni le li atouvui. Upa som ni le li ho chun laltouna a toupa ang’a chu lhujiuva a-imatih chan a hing jingpa ang’a chu alal lukhuh aselhah jiuva chibai aboh jiuva, “Vo ka-Pakaiyu le ka-Pathenu, nangma bou vahacoi le choiat, chule thilbol thei thahat chang lom nahi, ajeh chu ima jouse nangma sem ahi. Chule nangma phatsah-a hicheng chu uma chule kisema ahi.”

Hitia chu hiche phatlai mite chun hichu asim tengu hiche Greek te golseh a hatman sang hon abol danu chu alung uva kilang jia ahet theiyu ahi. Ajeh chu hatman sangpan loupi na chu apathen apeh ji ahi. Hichu hichana goljo na aneithei chu apathen jala bou ahi, tia mipi anga aphondoh na ahi. Paulin hiche lunggel neipuma, ahunglhung ding Pakai lengama tahsan chaten kipaman asan ding chu, miho hetthei nadinga amaho phatlaiya thil um, golseh a kon vetsah na anapeh ahi. 

BEMA DING MUN LE PHAT

Jesu Christa laltouna thutanna ding, aphat, amun etc. hohi bible-a kon kicheh taha hetthei ahi. Hiche sungin, Christa Thutanna ding mun, phat, thutan ding, le athu kitanding ho chungchang bible-a kon akhol chil ding ahi.

Thutanna ding phat                                                                                                                     

Christa Jesun thokit niting midih/chonpha ho kipaman hopna umding ahidan Luke 14:14 in hitin ana seiye, “Ajeh chu midih ho thokit teng le nangma nakisa ding ahi.” Midih ho ahilouleh houbung khanga tahsan chate ho rapture nikho teng thoukit dingu ahi tin Paulin Thessalonica houbung lekha athot masat chun aseiye (1Thess. 4:14-17):

Jesu athin athoudoh kittai, ti hi itahsanuva ahile, Pathenin Jesua ihmumilteho jong chu amatoh thakhat’a ahinpui ding ahi, ti iheuve. Hiche jeha chu Pakai thua kona hiche thu hi kaseipeh nahiuve, eiho Pakai hung geiya anahing nalai chengse hi aihmusaho sanga itihnama jongle masajo lou ding ihiuve. Ajeh chu Pakai chu amatah aotoh, vantil pipui awgintoh, chule Pathen sumkon gintoh, kithoa vana kona hung kumlha ding ahi; chule Christa a thisaho chengse thoudoh ding ahiuve; chujou le eiho ahingnalai amoh chengse hi amaho chengse chutoh vanlaijola Pakai lamto dinga mei konga toltouva ium khom dingu; chule chutia chu aimatihchana Pakaitoh iumkho jing dingu ahi.

Jesu Christa, mithengte puiya ahung teng, tahsan chate jouse Christa thutanna anga dingdiu ahi. Vetsahnan, 1Cor. 3:13, “atoh cheh-u hung kiphongdoh cheh ding ahi; ijeh-inem itile nikho ni chun aphondoh ding, hicheni chule meiya kiphongdoh ding ahi, hiteng chule anatoh aset aphat meiyin apatep ding ahi,” atin ahi. Hichea “nikho ni” atihi, Christa thutanna nikho ding ni chu aseina ahi. Hiche nikho teng chuleh meiya kiphong ding ahi. Hiche “mei” atihin, tonsota thina damun meidel “mei” aseina hilouvin, thilsuhthenga mei (vetsahnan, sana, sumeng, thih tiho, meiya kisutheng ahi) joh aseina ahi. Paulin hijeh chun kicheh tahin, “hiteng chule anantoh aset aphat meiyin apatep ding ahi,” atin ahi. Hiche bible changin asei pipen chu, tahsan chate natoh jouse kholtoh ding thua ahi, ahile hiche nikho chu itih hiding ham?

Hiche bible chang chu anoilang ivet leh bung 4:5 hin achunga thudoh toh kitoh hilchet na aneiye. “Chuti ahi jeh chun Pakai hung kahsen aphat masangin thu tanloi hih un; aman muthim a thilsel chu khovah a ahinphondoh ding ahi chule mihem lung sungin ipi agelem hi jong chu aphondoh ding ahinai. Hiche teng chule amitakip’in pachatna achan ding dol cheh Pathena kona asan ding ahi (1Cor.4:5).”  Hiche hin kicheh tahin Christa thutanna “bema” chu Pakai amatah amite puiya ahung kahsea umlouding ahidan aseiye. Revelation 22:12 sung ivetleh, “Veuvin keima kahung vah ding ahi; chule athilbol achonna dungjui cheh a lethuhna kapeh ding tohman kakoma aume,” Pakai Jesun ahung teng amite tohphat man apehcheh dingdan aseiye. Pakaiyin a kelngoi ching ho (pastors) kipaman apeh ding phat chu Peter’in hitin anasun’e, “Achingpipa hung kilah teng le nang hon aloupina lal lukhuh chul theilou chu nasan dingu ahi (1Pt. 5:4).” Paulin Pakaiya kona kipaman asanding phat chu ahunglhung ding phat “Pakai nikho niteng” ahidan Philippi houbung mite lekha athot chun ana seiye, “Hinna thu chu dom sangun; chutia chu moh lhaiya kahilou, moh tohgim jong kahilou chu, Christa nikho nileh kisonna kanei theina dingin (Phi.2:16).” Scofield in, “‘Pakai nikho’ kiti thugol hi ‘thutanna’ toh kisamkai ahijeh chun, ‘Christa nikho’ hi Pakai ahung teng mithengte ‘kipa man le phatthei channa’ ding nikho mong chu ahi”[19] atin ahi. Unger in hichu kicheh diuvin hitihin anaseiye:

Pakai amite puiya ahung ni ding chu, “Christa nikho” tia jong kisei ahi (Phi.1:6, 10; 1Cor.1:8; 2Tim.4:8). Hiche nikho chu vanlaijola Christan mitheng te natoh patep nale lallukhuh khuhpeh na anei nikho (2Cor.5:10; Rom.14:10; 1Cor.3:11-15) chule Kelngoinou golvah lopna phat ahi. Van’a chun Christa nikho ahi, ahin leiset a vang Antichrist phatlai ahi (2Thes.2:1-12). Christa nikho jong hin, tribulation sunga mitheng mollem ho thodoh na nikho (Rev.6:9-11; 20:4-6), changphal khoptupna nikho, chule Christa loupi tah le thanei taha Pakai nikho phondoh dinga leiseta ahung nikho, hiche ho jong hi ahop ahi.[20]

Paulin kathi teng kipaman ka sanpai ding ahi atipoi. Ahin Paulin kipaman asan nading nikho khat a-umchu ahen, Timothy koma “hiche nikho” atijon ahi. 2Tim.4:8, “Chonphatna lal lukhuh chu koisa ahitai; chondih a thutan Pakai chun hiche nikho ni chule eipeh ding ahi; keima chang jeng goh hilouva amahung kilah ngailu chengse jong chu apeh ding ahi.”

            Chunga bible chang hoa kona hetthei chu tahsan chate thutanna ding chu rapture jou hiding ahi. Robert Gromacki in jong hitin anaseiye, “Christa lal touna thutanna ding phat chu, itih phat hijong le hunglhung jeng thei ahi, tuni nikho jong hithei ahi.”[21] Hijeh chun Jacob’in hitin tilkhouna ana neiye, “Nang ho jong lungdehat jingun, na lungu detsah jingun; ajeh chu Pakai hungna ding anaitai. Vo sopite, oimo nachan louna dingun khat le khat kiphun loujenun; veuvin thutanpa chu kol bul’a ading jinge (Js.5:8-9)”.

Tahsan chate thutanna ding phat chu tahsan chate rapture a lahtou jou chuleh leiset’a thohhahsa (tribulation) phatlai sung hiding ahi. Pakai amatah a vantil tetoh awginto thoa vanlaijola mithengte puiya hung ding, chutia chu van’a tahsan chaten atohphat dungjui cheha kipaman lal lukhuh akisan ding chuleh kelngoinou golvah loupi tah umding, Chujou teng mithengte toh Pakai leiset’a kumsang lenggam vaihom dia hungkum diu ahi.

Thutanna ding Mun

Thutanna ding (bema) phat akihet leh hoilaiya hiche thutanna chu umding ham, amun ding jong hetlouvin apoimo kit’e. Hiche bema hi rapture jouva umding ahijeh chun leiset vang ahipoi ti amsapena hetthei khat chu ahi. Paul’in Thessalonica houbung mithengte henga hitin aseipeh e, “tahsan chate meiya ki toltouva vanlaijola Pakai to kimuto ding ahi” (4:17). Chuleh hiche Christa Laltouna Thutanna (bema) hi Pakai Jesu leiset’a mitheng tetoh kum sang lenggam vaipo dia ahung kum masang ahikit jehin, alhangpia hetthei chu van’a umding ahi. Ahin amun chetvang hetchet ahilou jehin, miho ngaidan jatchom chom a um’e.

1 Thessalonica 4:17 a kimu dungjuiyin, bema hi “vanlaijola” umding ahi tia seiloi jong a um’e. Vetsah nan, Samuel Hoyt in a lekha bu “The Judment Seat of Christ” a James M. Gray thusei alahson chu:

Hiche Bema hi Pakai to vanlaijola ikimuto teng uva dinga gonsa ahi, ahin hiche jeha chu vanlaijola Pakai to ichen den diu ahi tina ahipoi. Pakai to ikimuto na diu, ikilamto na diu mun bou ahin ichen nadiu ahipoi. Tahsan chate natoh dungjuiya thutanna ding mun le ahunglhung ding Pakai lenggam adia lallukhuh hopdoh namun bo ahi.[22]

Alangkhata, hiche bema hi vanloijol hilouvin vangam joha umding ahi tia seijong a um’e. E. Schuyler English in, “Mi abang khatin bema hi vanlaijola umdingin aseiyuve. Keima lunggelin vang vangam joha umding ahi,”[23] ati e. Christa Laltouna Thutanna mun dinga ginc            hat chu hiche tenibou (vanlaijol leh van gam) hi ahi. Bible in kicheh tahin seihih jong le hoilai mun ahiding vang bible a kon mama a muthei ahi.

Paul’in 2 Corinthian 5:10 a asei chu, eiho ibonchauva Christa thupi tanna anga chu ikilah cheh dingu ahi. Thuchang “ang/masang” kiti hin avetsah chu mun khata mikhat, thilkhat masang/angsung kisei na ahi. Hichu ahileh tahsan chate jong Pathen laltouna anga akilah diu chu aseina hitei ding ahi (Ps.11:4; Rev.4:2, 10). Chule Pathen laltouna chu vangam a um ahi. Upa som ni le li hochun laltouna toupa ang’a chu alal lukhuh aselhah jiuva chibai aboh jiu ahidan Revelation 4:10 in aseiye. Chuti ahile hiche Laltouna ang’a chu a lal lukhuh’u akisan uva chuleh hiche laltouna ang mamaa chu aselhah jiu tina ahi. Hichu ahileh tahsan chate thutanna (bema) ding chu vanlaijol hilouvin vangam, Pathen laltouna ang’a umding ahichu hetchet ahi tai.

Thutan Ding – Christa

Bema a thutan ding Pakai Jesu Christa ahidan bible mun tampia kon muthei ahi. Pa chun thutan ding jouse Chapa apehdoh dan John 5:22 in aseiye. Hiche thutanna Pan apeh chu Pathen (deity) hina jeha hilouvin amavang a mihem hina jal joha apeh ahi. Ajeh chu anoilang chu asim suh leh hitin aseiye, “Mihem Chapa ahijeh a chu thutan chaina thuneina apeh ahitai” (Jn.5:27). John 5:22 in thutan ding jouse chu Chapan atan ding ahi atibang chun Solchah 17:31 in ahilchet be chu tahsan chate bouseh hilouvin vannoi mite jouse thu atan ding chu ahi, “Aman (Pathen) nikho khat atep ahin, hiche ni chule ami tun chun chondihnaa vannoi hi athu atan ding ahi; ama chu athia kona akaithouva mijouse ahet kichensah ahitai.” Thina a kon thoudoh kit Mihem Chapa ahijeh chun mihem jouse thutan dinga Pan apansah ahi.

Khunung leh tahsan chate jouse, “Bema, Christa Laltouna Thutanna” a dingsoh kei ding ahi ti thugol hin, thutan ding Christa ahidan aphochen’e. Paulin Christa thutan ding ahichu ahen, hitin ana seiye, “Tua kipat hi keima dinga chonphatna lal lukhuh chu koisa ahitai; chondih a thutan Pakai chun hiche nikho chule eipeh ding ahi…” (2Tim. 4:8). Hiche thutannaa chu maipha vetna umlou ding chuleh sihnei, langnei, na jong umlou ding ahi. Ajeh chu “Pakaiyin mi koima datle langkaina aneipoi…” (Eph. 6:9). Mihem lunggel chun, akhang akhanga kon mihem, asim a jong simjou hoi hilou, sim senglou mihem chu Pakaiyin iti abona achona dol cheh le dihcheta thu atanjou ding ham tia lung kham nathei ahi. Ahin Pathen chu Omniscient (thiljouse hesoh) ahijehin mitam milhon chu Ama dingin a boipoi. Mi jouse atoh dungjui cheh le athilbol jouse seh seh hilouvin alung ngaito/gel geiya aphondoh ding ahi. “Chuti ahi jeh chun Pakai hung kahsen aphat masangin thu tanloi hih un; aman muthim a thilsel chu khovah a ahinphondoh ding chule mihem lung sungin ipi agelem hi jomg chu aphondoh ding ahinai…” (1Cor.4:5).

Isaiah Themgaovin Thutan ding, Christa chu lei mihema ahung peng masang (preincarnate) aloupina chu gaovin ana mun alaltouna vaipoh thudol ana hettoh sah’e (Is. 53: 1 cf. Jn.37; Is.6:10 cf. Jn. 12:40). John in jong Christa cross a athia, akivuiya, athodoh jou le van’a akaltou jou, kum somgup chun Christa chu aloupi na pumin ana mukitin, hichu thuphon bu in anasun lut’e. Christa Thutan dihtah ahidanin gaova amu chu hiti hin ana melchih e:

Aluchang le asam kelngoi muk ban a banga, buhbang tobang ahin; amit meikong tobang ahi; akengho chu lhum sunga kigoujol sum eng kinotval tobang jeng, chule a-ogin chu twi tamtah gin tobang jeng ahi. chule akhut jet lama ahsi sagi achoiyin, akam sunga konin hemto chemjam ahema hem ni ahungdoh-in ahi; chule ama melso chu nisa hasattah a asat pettoh abangin ahi.

Christa 100% mihem chuleh 100% Pathen chun eiho banga imalam jousea lhepna le patepna toh a, thoh a, ahijenga jong chonsetna nei louhel ahijeh chun mihemte bema a thutan dinga lhingset ahi. “Ajeh chu ihatmonau eihetpia eithohpi phah lou thempu chungnung neiya ihipouve, eibanga imalam jousea lhepna le patepna tohkha a thoh kha a ahijenga jong chonsetna nei louheljoh ineiyu ahi” (Heb. 4:15).

Athu kitanding – Houbung khanga tahsan chate

Christa Laltouna Thutannaa (bema) athu kitanding chu koiham hetthei nading chun bible a Pathenin eiseipeh ho’u vettoh a kholchil angaiyin ahi. Thuphon (Revelation) lang ivet leh michonse ho Laltouna Kang Thutanna a athu kitan ding hochu kum sang lenggam kichai masangsea thoudoh loudiu ahi ati’e (Rev.20:5, 11-15). Alangkhat’a Christa Laltouna thutanna (bema) chu Rapture jou, kum sang lenggam masang ahi. Chuti chu ahile michonse ho vang hiche Christa Laltouna Thutanna (bema) ahin ajao pouve ti akicheh tai.

Jacob thoh genthei (Jacob’s trouble) tia kihe tribulation teng jong le lol do ngap cha leuva Christa tahsana lhagao sochatna jong um ding ahi. Chuleh kum sang lenggam (millennium) teng jong le mi tampin Chrsita ahetchet diu atahsan diu, huhhingna anei diu ahi. Ahin bema hi houbung khanga tahsan chate rapture a Akilah tou jou jouleh umpai ding ahijeh chun thoh hahsa (tribulation) khanga Christa kisan ho leh kum sang lenggam (millennium) a Christa kisan ho jong ajao lou diu chu akicheh kit’e. Ajeh chu tribulation leh kum sang lenggam masanga rapture masa jo ahi. Hichu ahileh a chomlam taha seidingin bema a thu kitan ding ho chu houbung khanga tahsan chate, rapture nikho teng lahtouva um hobou hiding ahi.

Bema hi houbung khanga tahsan chate rapture teng lahtouva um ho ding bou ahichu Rom.14:10 le 2 Corinth 5:10 tenin aphochenin ahi, “Ajeh chu Pathen laltouna anga ibonchauva idin dingu ahinalaiye” (Rom.14:10). Chuleh “Eho ibonchauva Christa thupi tanna anga chu ikilah cheh dingu ahi” (2Cor.5:10) atikit’e.

Hijeh chun bema thutanna hi houbung khanga mitheng te ho ding bou ahi. Houbung khang hijong le tahsan lou (unsaved) ho vang hilou chuleh Old Testament a mitheng hojong hilou, tribulation a tahsan ho jong hilou, chukit le kum sang lenggam a tahsan ho jong hikit lou diu ahi. Hiche bema hi Pakai ahung kitteng tahsan chate ahing nalaicheng vou kikhela chuleh Christa jala thi hotoh thakhat’a vanlaijola Pakai lamto dia rapture a lahtouva um ho ding bou ahi. Alangkhata houbung khanga tahsan chate jouse koima ajaolou umlou ding ahi. Solchah minthang tah hihen, soh hihen, lhagao mi hihen hihih jongle, kitah hen kitahlou hijongle, tahsan chate (Christians) jouse Christa Laltouna Thutanna Anga dingsoh keiding ahi.

TAHSAN CHATE THU KITAN DINGDAN

Christan tahsan chate thu atan lona ding jeh pentah chu ahile tahsan chaten Pathen deilama hinkho aman nading chule kitahna neitaha Pathen na atohthei nading ahi. Chukit le Tahsan chate chonchan phondoha chutia chu kipaman lallukhuh itobang asanthei ding ham tia vettoh na ding ahi. Chuti ahijeh chun hiche sung hin itobanga ahiloule iti lampanga thutanna umding ham aseidoh ding ahi. Pathenin tahsan chate thu atanding dan chu hopthuma hop khen thei ahi; a) Christian mimal hinkho; b) Pathenin anganse na gou/nei chin; c) Anatoh dungjui cheha ahi.

Lhacha/Soh – Christian mimal hinkho

Pathen lhacha mimal hinkho hi, hatman sanna dinga, imalam jousea a-tibah-u timhat jing, golseh kilhai tetna pang ho toh aki tekahin ahi. Paul’in hitin ana seiye, “Chule kibot ima hijongle golseh jouving, tia guttena chun ati chunguva atibah-u ijakaiya atimhat jiuve. Amaho chun lallukhuh kem mangthei lonaa abolu ahin, eihovang kem mangtheilou lallukhuh loa ihiuve” (1Cor.9:25). Thuchang “timhat” kiti hi Greek paova“egkrateuomai” akitin hichu “en” le “kratos” (thanei/thahat) thuchang teni ki gomkhom ahin, akoudoh chu “ama ki thunun jou” or “ama kitimjou” ahi.[24]

Isthmian kichep golseh hi tahsan chate hinkho toh tekah ahi. “Tohphat man kasan ding chu iham?” (1Cor.9:18). Paulin Corinthian thot khatna bung ko chang som le get a pat somni le thum sungin gospel thupha jala atahsa athunun dan aseiyin ahi. Paulin kipaman asanding chu ahunglhung ding khanga ahichu ahen, hichu galdot pumin kitah tah le kiphaltheng tahin mijouse dingin ijakai akisojin ahi. Chang somni le li apat somni le sagi sungin, Isthmian lhaitet golseha hatman sanna dinga lhaiho vetsah na apen ahi. “Kati hi kachup kachupjia kathua kanunsah ahi. Achutiloule… keimatah ijamtin lah louvin um khange” (9:27), atin ahi. Tahsa lam ngaichat suhbulhit nading mun pehihun atikit e (Rom.13:14). Mimal hinkho kitim them theina ding chun lhagao kipui hoisah angaiyin ahi. Hijeh chun Paul in Galatia houbung mite lekha athot chun hitin ana seiye, “Keima vangin, Lhagaovin chonun, kati ahi, chutile tahsaphe lam lungtup chu subulhit lou ding nahiuve” (Gal.5:16). Anoilang chu isuhsim leh chang somni le thum nan, “mimal/ama chang kitim” kiti hi lhagao ga laha apangin ahi.

Hijeh chun Christa Laltouna Thutanna anga kipaman san nading chun mimal hinkhoa kitim them angaiye. Akhuti loule kipaman sang dinga lhingjou louding ahi. Jing le thaiya goppai ding lallukhuh lona atibah-u ijakaiya atimhat jiule eiho kemmang theilou lallukhuh lona iha kitim jocheh loudiu ham!

Gou/Nei Chingtup

Gou/nei chin kiti hi Greek thuchang “oikonomos” akon kilason ahi. Hiche “oikonomos” hi Greek thuchang ni “oikos” (inn) le “nemo” (vetup/chingtup) kigom khom ahi. Hichun a koudoh chu “innsung vetup,” “vesui,” “chingtup” ahi.[25] Paul in hiche chungchang hi hitin, “Keiho hi Christa lhachale Pathen thuguh thutan gou chingin min eingaitouhen” (1Cor.4:1) anaseiye.

Nei chin chungchanga hin Pakai Jesun thulem thum ana seiye; Lengpileiya Natong ho (Matt. 20:1-16); Talent kihoppeh Thulem (Matt.25:14-30) chule Sum somkhat thulem (Lk. 19:11-27). Hiche thulem thum hohi Pakai lenggam teng, neichingtup a kinganse ho anatoh phat dungjui cheha Pakaiyin kipaman apehding vetsahna ahi.

  1. Lengpileiya natong ho thulem (Mtt.20:1-16)

Lengpileiya natong ho thulem (Mtt. 20:1-16) hi kum sang lenggam (millennium) a thilsoh ding chungchang ahi. Peter’in keihon ipi kasan dingu ham, ajehchu ka imajouseu kahin dalhah u ahi, tin lungkham tahin thu aseiye (Mtt. 19:27). Ahin Pakaiyin adonbut in, “Tahbeh a kaseipeh nahiuve, semthahna a Mihem Chapa aloupina laltouna a atou teng le nang ho eijui chengse jong hi laltouna som le nia natouvuva Israel phung som le phung ni thu natan dingu ahi” (Mtt.19:28) ati. Pakai Jesun hiche hi leiset a kum sang khat lengvai apoh ding chungchang thua asei ahi. Ajehchu hiche aseijou jouva lengpileiya natong ho thulem hi asei ahi.

Jingpi tahin lengpi leiya, natonga goi ding mi holin mipa khat achen, nikhata seki ni lo dingin akihoupin natongin asol tai. Vai nungin kaithela mohjen a ding ho agamudoh in natongin asol kit’e.  Sun kimvel le ni kiheiyin chujongle vai chephat geiyin chutobang chun abolin ahi. Nilhah ahiphatin lengpi leiya natong hochu, agoi nukhah a patin goi masat chan atha manu kibang chetin apen ahi. Anatohnau phat akibah louvangin a nikho tha manu akibangin ahi. Phat kibang achan louvangun sum kibangin achang uve.

Hiche thulem in aseinom chu kipa man chu natoh chom le sao ahilouleh natoh tam le lhom jeh hilouvin amavang akinganse na chunga akitah na dungjui cheh joh ahi, tin G. Campbell Morgan[26] in aseiyin ahi. Nei chingtup a, akinganse dungjuiya, kitahna nei tahsan chate kipaman peh dingdan thutan na ahi.

  1. Lhacha Mithum Thulem (Mtt.25:14-30)

Pakai Jesun hiche thulem hi kum sang lenggam (millennium) a kipaman ahop dingdan ahilna ahi. Hiche thulem asei masang jepa nungah som thulem aseitoh hiche thulemin avetsah chu Pakai lhacha ho, a umlou kaha atohdiuva kipe/kinganse na chungchang thu ahi. Chule Pakai Christa chu anei chengse asohte khut’a pedoha khol gamla chemang mipa toh aki tekah in ahi. Athan ajokhop cheh’in asohte chu anei ahoppeh ‘e. Amasapa nga apen, a banna pa ni apen chule athumna pa khat apen ahi. Amasa pa le anina pan ajatle ni in aveikan lhonin, athumna pan vang leiko alaiyin apakaipa sum chu aselmang’e. Apakaipan amasa teni jaha, “Soh pha tahsan umtah, nabol aphatave; nangma them khat chunga tahsan umtah nahin, keiman nangma tamtah chunga kapansah ding nahi; nangma napakai kipana’a luttan (vv.21, 23), atin ahi.

Hiche thulemin avetsah chu tahsan chate jouse Pakaiyin ama hina dungjui cheha talent apehsoh kei ahi. Mijousen nikho khat le Pakai anga hiche talent chu ijat aveikan em Pakaiyin ahin kholding ahi. Hiche hinkho a kitah ho chu ahunglhung ding khanga jong thil lentah a chan aneidiu ahi. Solchah John in hiche chungchanga hitin anaseiye, “Chule asoh ten ama chu ajen dingu ahi” (Rev.22:3). Hiche hinkho hi ahung lhungding khanga kipaman sanna dinga patep naphat ahi. Amitakip boltheina, talent, kibang hih jongle, hiche thulemin asei chu, akitah jouse kipaman thakhata asan chehdiu ahi.

  1. Sum Somkhat Thulem (Lk.19:11-27)

Pakai Jesun David lenggam apettaha atundoh a, lengvai apoha, Romete thaneina a kona Jewste a zalen sah pai jeng dinga ageljeh uva hiche thulem hi asei ahi. Hijeh chun, Milun tah khat leng changa, chule hung kile kit dinga, khol gamlatah ache ding kona asohte mi som akoukhoma mina som ana veikandiuva pepa toh tekahna apen ahi (vv.12, 13). Hiti chun a pakaipauvin, anei chu ahoppeh e. Chuin ama aleng chana ahung kit phat’in asohte hon anganse na chunga ijatjat, ipipi aveikanum tin akoukhomin akhol tai. Amasapan mina khat a konin som anaveikan’e. Pakaiyin amapa jaha, “Nabol aphai, soh pha; nangma themcha khat chunga tahsan naum jeh chun kho som chungah vaipon pangin,” (v.17) atin ahi. Aban’a pan mina khat a konin nga anaveikan be’e. Hiti chun amajaha jong, “Nang jong kho nga chungah vaipon pangin,” (v.19) ati. Akinganse na chunga kitah nanei chun atoh phat bang taha kipaman jong asan ding ahi. Achaina pa, ima ana boldohlou pa hi, Pakaiyin akineppi tah Jewste tithei ahi. “Soh gilou” (v.22) akitin chule Pakai doujing, achung uva leng ding, vaipo dia deilou ho, achaina le Pakaiyin atha ding chu ahi (vv.14, 27).

Hiche thulemin asei pipen chu chanvou le phatbih kibang chang jongle kitahna kibanglou chu kipa man jong kibang lou ding ahi. Soh ho chu abonin kibangin mina khat cheh achang uve, ahin kibangin hiche mina chu aveikan pouve. Chutia chu atam veikanpan kipa man atamsan ding chule alhom veikan pan alhom san ding ahi.

Lhacha mithum thulem chun, Scroggie seidanin, talent kibang lou hijongle akitah jouse chun kipaman kibang akisan ding ahi. Chule sum somkhat thulem’a chu talent kibang chang ahivanga kitahna kibang lou chu kipaman jong kibang louding ahi.[27] Ahin lengpi leiya natong ho thulem in aseivang chu, phat kilamchang kibang chang hih jongle akitah jouse kipaman kibanga chang ding ahi.

Lhacha natoh chungchang

            Tahsan chate thu tana ding chung changa, Christian mimal hinkho le neiching tupa akinganse na akikhol dohle, anatoh chungchang jong kholgil angaiye. Pakai thutan dih le then jidan vetsahna, ‘mei’ meiyin mijouse natoh “aset aphat” apatep ding, 1 Corinth bung thum nan akimu’e. Hiche ni chule anatoh chu kipaman sang dinga lhing hinam, lhinglou ham, meiyin aphondoh ding ahi. Naa tohdoh let le neo maijenseh hilouvin, itobang taha atoh doh ham? Ama chang kingailu, ama kivahchoi naa atoh ham ahiloule ama kisumil leuva, Pakai loupi nadinga atoh ham? Tahsa lam thahat najala atoh ham, lhagao panpi najala atoh doh ham? Ana toh chu Pathen lungdei lama atoh ham, miho lunglhai najoha atoh ham? Hiche chungchang hi Pentecost in hitin ana seiye:

Pakai lhacha, Pathen’a kona, Pathen loupina dinga tong ho chu, sanaa, dangkaa le song mantam’a sa ho ahi, chule ama kiloupi sah nale ama chang kivahchoi naa tong ho chu, thing, bi chuleh changpol a sa ho chu ahi.[28]

Pakaiyin meiya ahinkhol teng, koi koi hijongle a-innsah chu adin jinga ahile, tohphat man asan ding ahi. Amavang a-innsah chu akahvama ahile kipaman ima asan louding ahi. Chuche bul kiphut chunga chun koi hijongle sanaa sa noman sahen, dangkaa sa noman sahen, song mantama sa noman sahen, bia sa noman sahen, polla sa noman sahen, thinga sanomin sahen; atoh che-u hung kiphongdoh cheh ding ahi; ijeh-inem itile nikho ni chun aphondoh ding, hicheni chule meiya kiphongdoh ding ahi, hiteng chule anatoh aset aphat meiyin apatep ding ahi (1 Cor.3:12-13).

CHRISTA BEMA ANGA NATOH KIPHON – NEGATIVE LE POSITIVE

            Tahsan chate thutan niteng mi jouse natoh hung kiphong cheh ding ahi. Hiche ni chule mijouse natoh aset aphat meiyin apatep ding ahi. Pakaiyin meiya ahin patep teng mijousen itobanga na atoh ham, hung kicheh ding ahi. Hiche natoh kiphon dingdan chu jatni a lhekhen thei ahi; Negative le Positive.

NEGATIVE

Paul in Corinth houbung mithengte lekha a thot masat chun hiche chungchang hi hitin anaseiye, “Chuleh koi hile a-insah chu akahvama ahile, ama chu hakam ding; amatah vang huhhinga um ding ahi, ahivangin meikong lah pal galkaiya bang ding ahi” (1Cor.3:15).

Hakam/Chaan ding

            Pathen thun kicheh tahin, kipaman chu santhei le chan thei ahidan aseiye (1Cor. 3:15). Ahin hiche a chaan/hakam ding atihen, chonsete hon vangam achaan uva, damun meidil ajotdiu tina hilouvin, tahsan chate ho, huhhinga umsate ho anatoh dungjui cheha tohphat man kihop niteng, anatoh hoilou ho chun kipaman achaan ding johu ahi. Kipaman Pakaiyin natoh dungjuiya thu ahin tanna ahop teng achaan umding chu adih le hetdohthei ahi. Vetsahna phapen chu, Pakaiyin Sodom le Gomorah thu atana Lot in athil jouse achaan tobang hiding ahi. Hiche chungchanga hin Pache in hitin ana sun’e:

Gelin, amachang phatchom nading bou geljeha anatoh jouse amasang taha kisumong, chule a-imajouse manga ahinkho jong nah naha hingdoh pa. Hitobang mipa chu Lot, tahsa lamjeng lunggel nei, Sodom khopi chonset sanna muna cheng pa toh kilou louham? Pathen thutan nikho chun, henge Lot chun mei chu apeldoh nai, ahinkho aki huhhing nai, ahin anei agou achaanin, ajinu achaanin, chule amin (honor) jengjong achaan’e.[29]

Paul in kipaman achaan le hakama aumlou nadia atahsa phatecha akiven a athunun dan hitin ana seiye, “Kati hi kachup kachupjia kathua kanunsah ahi. Achuti loule midangho thu kahile nungle ajole keimatah ijemtin lah louvin um khange” (1Cor. 9:27). Paulin “lahlouvin um khange” ati hi huhhingin umda khange, ati hilouvin, kipaman sanda khange atina joh ahi. Hijeha chu Paul, kilhei tetna pangho banga, kipaman achaan khah louna dinga kiveng a, ijakai asuboi thei jousea kon kikang sea, kitima, atahsa athu joa lhei ahi. Mason in hiche chungchang hi hitin ahilchen’e:

Bema chu thutan/lamkai hon akichem ho ki chepdan le golseh dan ho avetsui nao mun ahi. Khat touvin golseh dan ahin palkeh khahle lamkai amu hon, khat kahe poi ni/thum kahe poi, amapa chu ako uva, “Adokimos!” (adih tapoi, dan sukeh tai) tia asap jiu ahi. Hitia chu ipi kitetna hijongle, itobangin lhei henlang, them henlang, hat jongle amapa chu kipaman sang dinga lhingjou lou ahitai. Hibanga chu golnop kichai teng kitetna pang jouse chu bema anga ding diu lamkai hon kipaman chang dinga goljona nei ho ahin phondoh diu ahi. Hiche hi Pakaiyin anatoh dungjuiya kipaman asanthei ham, asang dinga lhingjou lou ham, tia tahsan chate thu atanding dan hilchet na phatah chu ahi.[30]

Bema a thutan nading chu tahsan chate tahsan umho, kitah na nei ho kipaman pehna ding hijong le Christian holaha jong kipaman sang louding ahiloule, kipaman, kitahlou jeha changlou ding uminte. Thudiha Pathen natong ho bouvin kipaman asandiu ahi. Chonset natoh, lunggel, ngaito, lungthim jouse tahsa lam thiljeng ahijehchun meiyin akahvam sohhel ding ahi. Tahsan chate tampi khutgoh keovin dinginte, natoh tohdoh tampi tongdoh jongle kipaman sang dinga lhingjou louva, hakam ding ahiuve. Tonsotin kipaman chu chan untin amatah vang huhhingin umnante.

Jum/maimoh ding

Solchah John in hiche chungchanga hitihin ana seiye, “Chule tun kanaote ho, ama ahung kilah teng eiho ikhakat theiyuva chule ama ahung teng le ama a kona imaimoh louna dingun ama jeng’ah um jingun” (1 John. 2:28). Hiche chang sunga John in, kanaote/chate (teknia) atiho henga Christa ahung ki lahding chungchang thua asei ahi. Chutia imaimoh louna dingun, atileh hichun avetsah chu amaimoh ding jong a um’e ti chu hetding ahi. Vetsahna phapen, ahinkhoa kitahlou jeha jum/maimoh chu, Seijui Peter pehthei ahi. Pakai Jesu akimat jouva, thempu len anga akipui chun Peter in ana juipeh e. “Hiti chun Peter in ah khon masangin thumvei ana seilep lotan ahi. Chuin Pakai chu akiheiyin Peter lam aven ahile, “Tunia ah khon masanga thumvei neiseilep ding ahi” tia Pakayin asei chu ageldoh-in, po lama apot’in lhase tah-in hakan akaptan ahi” (Lk.22:61-62). Pakai mai amu phata Peter in ahin kihetdoh ahi, ahin akisihna le ajum nachu Pakaiyin avet jeh hilouvin, ana bolkhel ho chu ageldoh jehjoh ahi. Van gam ahin, damun ahin, mi jousen leisetna ana chonna ho jouse ki geldoh na khat aneisoh kei ding ahi. Luke in hiche chungchang hi, Abraham le Mihaopa kihou naa konin vetsahna ana pe e, “Ahinvangin Abrahamin, ‘kachapa, nangin nahinlai chun thilpha namun, hiche bang chun Lazarus hin thil phalou amun, hichu geldoh-in; tuvanga ama hikoma lung mong tah a uma nangma gimthoh a um nahitai” (Lk.16:25).

Christa Bema anga jum/maimoh ding kiti chun Christa a kona jum/maimoh na kimuding hilouvin, amavang a chonset na kigel doha, a kitah louna kigeldoha, chuleh akinganse na nahsah moa ana umna ho jouse jeh bouva jum/maimoh ding joh ahi.

Achom lama seidingin, Christa Bema Anga, jum/maimoh na umding ahi, hichu amitakip amachung changa ana kitah louna ho jouse jeh hiding ahi. Hijeh a chu, thasan chate hon Pathen lungdei lamjoh a na atoh tei nadiuva Bible in atilkhou jing ahi.

 POSITIVE – A LHANGPI

Samuel Hoyt in tahsan chate kipaman sanding “positive” chungchang hi jat ni, “a lhangpi le a hoi dehset,” tin alhe khen e.[31] Paul in Corinth houbung mitheng te lekha athot masat chun hiche gotchom chom ahidan ana seiye: “Van vou aumin, leiset vou jong aume; ahivangin van tipum loupina achom ahin, leiset vou loupina achom ahi. Nisa loupina achom ahin, lhathah loupina achom ahi; chule ahsi jong achom ahi ahsi le ahsi jong achom chom aume. Chutobangma chu athiho thokit jong hiding ahi. Monmang theiya kitua ahin, monmang theilouva kikaithou ahi” (1 Cor.15:40-42). Hiche chang sung hi Paul in thokit na chung chang thua asei ahi, chukal le hiche a mudoh thei kit chu, tahsan chate kipaman san ding chu gotchom chom ahi. Van, leiset, nisa, lhathah, ahsi ho jouse a loupi nao jong gotchom cheh ahibanga tahsan chate thokit niteng aloupi nao (asan dingu kipaman) gotchom cheh hiding ahi. Anoiya bang hin aban banin hilchet ahi.

Pachat na

Kipa man gotchom chom laha khat chu “epinos” akitin hichu Pathen seiphatna/pachat na ahi. Vetsah nan, 1 Cor. 4:5, “Chuti ahi jeh chun Pakai hung kahsen aphat masangin thu tanloi hih un … hiche teng chule amitakip’in pachatna achan ding dol cheh Pathena kona asan ding ahi.” Hiche chang hi, aki nganse na chunga tahsan um soh chunga, Pathenin aseiphat ding thua ahi. Hitia asei, “Soh pha le soh kitah nabol apha e” Pakai kamcheng taha jah ding chu ni loupi hin tin chule kipana loupi tah hiding ahi. Pakaiyin hiche niteng pachatna apeh ding ahijeh chun leiset a koima pachat lou akhoh/apoimo poi.

Jabol/Choiat na

            Jabol/Choiat[32] na hi tahsan chate kipaman sanding laha khat ahi. Hiche chung chang hi Peter in hitin ana seiye, “Naginchat nau kipatep, meiya akipatep nunga jong mang thei sana sanga lujoa chu Jesu Christa hung kilah teng vahcoina, choiatna chule loupina ahi theina ding ahi” (1 Pt.1:7). Jabol/choiatna hi, Vine in asei chu, “Tunung teng, tahsan jala patepna toh, mitheng te sanding kipa man ahi.”[33] Thayer in jong hiche Choiatna hi ahunglhung ding hinkho a sanding kipaman ahi, atin ahi.[34] Solchah Paul in tunung/ahunglhung ding nikho a thohhat jala kipaman asanding chungchang thua, hitin ana seiye, “Thilpha bola ponthoa lungdesot hatna, loupina, jana, chule kemlou holte chu hin kemlou apeh ding ahi…. Thilpha bol chengse vang chu loupina, choiatna, chule lungmonna kipe ding ahi. Judah mi masantin chule Gentile mi hiding ahi” (Rom. 2:7 & 10). Pakai Jesun Pathen na tong jouse Pan choiatna apeh ding dan hitin ana seiye, “Koi hijongle kalhacha panga chun kanung eijuihen; keima umnaa chu lhacha jong um ding ahi; mi koi hi le kalhacha panga chu Pa chun ajabol ding ahi” (Jn.12:26). Hitin jong Pakai Jesun aseibe kit e, “Pathen khatseh a hung kon chaoiat chu hol louva nang ho khat’in khat choiat kisangtouva chu, iti natahsan thei dingu ham?” (Jn.5:44).

Loupi na

Greek paovin, loupi kiti thuchang hi “doxa” akitin ahi. Loupi kiti thuchang Bible mun tampin kimu jong le hiche laiya kisei loupi nahi tahsan chate Pakaiyin kipaman apeh ding ho laha khat chung chang thua ahi. Solchah Paul in Colosia 3:4 in hitin asun e, “Ihinnau Christa ahung kilah tengle, amatoh thakhat tah-a nangho jong loupitah-a kilangdoh ding nahiuve.” Hiche loupitaha kilang doh ding atihin Christa loupi na vah’a kon a hung kilangdoh ding chu aseina ahi. Pakai Jesun jong hitia aseisa ahi, “Chutengle michonphate chengse a-Pau gama nisa banga vah ding ahiuve” (Mtt. 13:43). Mundang a kipaman ‘loupina’ kimu kit chu, Rom. 9:23, “Chuche alungset bel-ho chunga chu aloupina hou chu hetsah ding lung agot ahile…” Chukit le Paul in 2 Corinth 4:17 in hitin aseiye, “Ijeh-inem itle chomkhat jengcha dinga kathohjiu hesoh gentheina jangkhai hin tonsot kemlou loupina chu hasema eisempeh be jing jengu ahi.” Van a, tonsot a, tahsan chate nun nom nading khat chu, tonsot a loupina achan ding chu ahi.

Luttheina (Chrita kom) letset

            Peter in tahsan chate chingthei taha akikou nao toh kitoha adindet jingna ding’un atilkhouvin ahi. Hitia hi ana tilkhou ahi, “Chutia chu i-Pakaiyu chule Huhhinga Jesu Christa tonsot um jing gama chu lut theina thu letsettah a nakipe dingu ahi” (2 Pt.1:11). Hiche “lut theina letset” hi Greek verb “plousios” ahi. Hichun akoudoh chu, lutthei na lhingset, luttheina letsettah, ahi. Peter in hitia chu Pathenin tahsan chate jouse hongphal taha luttheina lhingset apeh, ahilou le, tahsan chate kipaman a lutthei na letsettah a apeh ding dan aseina ahi.

Gou (Van’a gou)

            Pakai Jesun, tukhang hi ahung lhung ding khang a dinga gou khol (investment) a chutia chu khonung le hiche gou chu noptaha lo theina ding chungchang Matthew 6:19-21 sungin ana seiye:

Nget le twieh-in asuhmang theina guchan aphet vanga aguh mang theina leiset chungah gou khol hih-un; amavang nget le twi-eh-in asuh mang thei louna, guchan jong aphet vanga aguh mang thei louna vanah nagou kholun; ijeh-inem itile nagou umna a chu nalung jong um ding ahi.

Christan hiti chun tahsan chate kipaman ding chu van’a gou khol to atekah e, chule kipaman kihop teng hiche gou chan thei nading chun tu hinkho sunga hi kikhol (invest) ding ahidan aseiyin ahi.

Goulona

            Tahsan chaten nikhat le van a gou alo ding ahi tin Bible mun tampin eihil uve. Pathen gam lut theina chu ki lamdoh hilouvin Pathenin achapa Jesu Christa tahsan jouse manbeiya apeh joh ahi. Ahin goulo ding kiti vang hi, kipaman hoitah ahin, achang dinga kigot peh ho a ding bou ahi. Colossae 3:23, “Chule Pakaiya kona goulona thilpeh nachan dingu chu heuvinlang, nabol chanu chu mihem dinga hilouvin, Pakai dingin nalung gilin bolun,” atin ahi.

Alangkhat Rome 8:17 a, solchah Paul sei dungjuiyin tahsan chate jouse Pathenin “chate” asah e, Christa to goulo khom dinga agon ahi. Achuti leh Chapa Christa to goulo khom theina ding chun, Christa toh genthei thoh khom angaiyin ahi. “Chate ihi jouseuva goulo ding ihiuve. Pathen goulo ding chule Christa toh lo khom ding ihiuve, amatoh choiat’a ium khom theina dinguva amatoh thoh khoma ihiuve” (v.17). Christa to genthei thoh khom ding chu Christan huhhingna dingle lhatdamna dinga genthei athoh chu hilouvin, alhatdoh saten, Christa min jala bol genthei naho athoh joh chu aseina ahi. Christan hitia ana sei masat ahi:

Vannoiyin na hot’u le nang ho nahot masanguva keima eihot chu naheuve, nang ho vannoiya hileu chun vannoiyin ama a chu angailut ding ahin; tunla nang ho vannoiya nahi louvu vannoiya kona keiman kalhendoh nahiuvin, hiche jeh a chu vannoiyin nahot’u ahi. Najah uva kathusei ‘Soh apakai sangin achungnungjopoi,’ kati chu geldoh-un. Amahon kei eibolseuva chu nang ho nabolset dingu ahi. Kathu nit leu nang ho thu jong anit dingu ahi.

Chutobang machun Paul in Timothy lekha athot chun Christa min’a genthei athoh ding dan ana seiye. “Chule koi hile Pathen ngaisah kijentah a Christa Jesua hinga um lung go chan chun bolsetna athoh ding ahi” (2 Tim.3:12). Hintin Pathen in, goulo kipaman, apeh ding ho chu Christa jala hesoh genthei thoh ho ahi.

Vaipoh na

            Tonsot a Pakai to vaipoh khom ding chu tahsan chate kipa man laha khat ahi. Christa Jesun seijui ho henga, kum sang lenggam teng, laltouna som le nia atouvuva Israel phung som le ni chunga vai apoh diu chung chang hitin ana seiye. “Jesus adonbut’in ajah uva, ‘tahbeh a kaseipeh nahiuve, semthahna a Mihem Chapa aloupina loltouna a atou teng le nang ho eijui chengse jong hi laltouna som le nia natouvuva Israel phung som le phung ni thu natan dingu ahi’” (Matt. 19:28). Solchah Paul’in Christa tahsa, Houbung, jong Christa to vai hom ding ahidan aseiye. “Athoh chu ithoh piu le avaipoh jong ipohpi dingu ahi…” (2 Tim. 2:12). Chujong le mithengten vannoi thu le vantilteho thu atan ding ahi tinjong aseiye, “Ahiloule mithengten vannoi thu atan dingu hi nahet lou mongu ham? Chule vannoi thu nangho tan ding ahile, thu neopen tan ding chu atan dinga kilom lou nahiuvem? Tulai hinkho thu seilouva, eiho hin vantilteho thu san jong itan dingu ahi, hi helou nahiuvem?” (1 Cor. 6:2-3). Pakai, a lenggam tungdoh dinga ahung kit teng tu hinkho a kitah ho jouse, tonsota lengvai apoh khompi ding ahi.             

POSITIVE – A HOI DEHSET

Lallukhuh umdol

            Tahsan chate san ding kipaman laha, ahoi dehset hohi lallukhuh ahi. “Lallukhuh” kiti thuchang hi Greek pao, “stephanos” le “diadema” akon kilason ahi. Stephenos kiti thuchang hi Greek verb “stepho” akon kilason ahin hichun akoudoh chu “kolbem” or “akol a kisem” ahi.[35]  Chutia chu pahvui kithil a ahiloule thing do kithil a, lu a khuh dinga akola kisem ahi. Thulhun Thah sungin hiche thuchang hi, som ni le khat vei, akimun ahi. Thulhun Thah sunga stephenos kiman dan ho chu, kichen naa ahin chule golnop loupi kibol teng; kichep golseha goljo na neiho japi anga, gaal hang ho, gaal jou ho, chule anatoh pha ho, hitia chu kipaman alu uva thingdo ahiloule pahvui kithil chu kikhuh peh ahi.

Alangkhat a “diadema” kiti chuchang hi Thulhun Thah sunga thumvei akimu e (Rev. 12:3; 13:1; 19:12). Hiche hi Greek verb “diadeo” a kon kilason ahin akoudoh chu “akol a kipheh/kikan” tina ahi. Diadema hin, leng hina, thanei vaihom na, ahiloule thunei lengvaipoh na ho avetsah e. Thayer in, “stephenos” chu golseha hat ho ahin, sepai hangsan ho ahin, kichen niteng ahin, golnop thupi ho ahin, hiti ho chunga kimang cha ahi. Ahin “diadema” vang chu leng le lal ho chunga bou kimang ahi[36], atin ahi.

Pakai ahung kit teng tahsan chate atohphat dungjui cheha kipaman apeh ding chu diadema hilouvin stephonos joh ahi chu akicheh e. Hiche tahsan chate kipaman Pakaiyin agot peh laha ahoideh set ho chu chi nga a hopkhen thei ahi: Kem mang theilou Lallukhuh; Kipana Lallukhuh; Chonphatna Lallukhuh; Loupina Lallukhuh chuleh Hinna Lallukhuh ahi. Hiche Lallukhuh nga ho chu anoiya bangin hilchet ahi.

Kem mang theilou Lallukhuh

Paul in 1 Corinth 9:25 naa Christian hinkho le athlete ho hinkho tekah na hitin aneiye; “Chule kibot ima hijongle golseh jouving tia guttena chun ati chunguva atibah-u ijakaiya atimhat jiuve. Amaho chu lallukhuh kem mangthei lonaa abolu ahin, eiho vang kem mangtheilou lallukhuh loa ihiuve.” Tahsan chate kikhuh ding kipaman chu Greek paovin “stephenos” aki ti e. Hichu kem mangtheilou lallukhuh ahi. Solchah Paul in hiche kem mangtheilou kipa man hito kem mangpai ding (phtartos stephos) kipaman golseh a hatman sang hon akikhuh u, tekah na anei ahi. Paul lekha thot naho chu Isthmian golseh phatah a he ho ahiuve. Hitobang a jaothei na ding chun kichuh na lha som nei masat angaiye. Hatman san na ding chun a tahsa phataha kitim them ding, neh le chah kitim them ding ahi. Ahin che a kipaman chu thingna bo ahi, chomkhat goplha pai ding ahi. Alangkhat a Greek te golseh banga phat chomkhat jou le gop paiding kipaman tobang hilou tonsot a kem mangthei lou kipaman ahijeh chun Christian ten ama ho sanga nasa joa kichuh ding chu alouthei lou ahi. Lhagao kilhai tetna lhei Christian hon, tahsa suboi thei jousea kona kitim them ding akhoh e. Ama kitim them, tahsa kithu nun jou nahi Pathen naa lhingset a tohdoh nadinga ngaikhoh mama jeng ahi. Kem mangthei lou lallukhuh sang ding mi chun chingthei tah le kitim them taha hinkho aman ngai ahi.

Achom lam pena sei dingin, kem mangthei lou lallukhuh sang ding chu lhagao hinkho le atohna lam a, ama kitim them le atahsa thunun jou ho ahi. Tahsan chate lhagaova hing, tahsa hinkho kitup tah a mang ho ding ahi. Christa sepai hi na a thoh hahsa thohgim a, golseh kitetna banga kiha bol keu hilouva dan ngaitah a bol ho ding ahi (2 Tim. 2:3-5).

Kipana Lallukhuh

Solchah Paul in Thessalonica a um tahsan mite chu Christa hung kilah teng, ama kipana lallukhuh ahidiu chu lekha athot masat chun ana seiye. “Kakinepnau, kakipanau, chule kaloupinau, lallukhuh chu iham? Pakai Jesu Christa hung tengle, ama anga ding nangho nahi louvu ham? Ahi, tahbeh-in kaloupi nau le kakipana dingu nangho nahiuve (1 Thess. 2:19-20). Philippi 4:1 sunga, Paul’in ana phudoh Philippi houbung chu kakipa nale ka lukhuh tin aseiye; “Chuti ahi jeh chun, kasopi deitah teho chule kangaitah teho, kakipana le kalukhuh, sahtah teho, hiti hin Pakiayah umdet jingun.”

Hiche kipana lallukhuh hi lhagao mangthai huhdoh ho, Christa henga lhagao hinpui ho, tonsot thinaa kona tonsot hinna lampia mi hinpui ho san ding ahi. Hiche chungchang hi Paul’in hitin anaseiye, “Pathen tomlah a nachunguva katomlah ahi, nungah theng banga Christa khut’a kapeh theina dinguva, nangho inneipu khatseh Christa dinga katuhhol nahiuve” (2 Cor.11:2). Christa henga mi hinpui lut ho goh hilouvin, ama taona jala ahilou le ama muchi tu jala, mihon Christa akimu doh na  a pang ho jong ahi. Hitobang miho ding chun Jesu hung kit ding chu iti kinep um hitam, iti kipa thanop a um tadem. Ajeh chu amahon kipana lallukhuh asan dingu ahi.

Chonphatna Lallukhuh

Kipa man ahoideh set laha chonphatna lallukhuh jong hi khat ahi. Hiche chungchang hi martyr a aum ding kon’a Paul’in Timothy lekha athot chun hitin aseiye.

Golseh phatah chu kaseh joutai, kitlhaitet na kachaitai, tahsan chu kamolsotai. Tua kipat hi keima dinga chonphatna lal lukhuh chu koisa ahitai; chondih a thutan Pakai chun hiche nikho ni chule eipeh ding ahi; keima chang jeng goh hilouva ama hung kilah ngailu chengse jong chu apeh ding ahi (2 Tim. 5:7-8).

Hiche chonphatna lallukhuh hi limgeh cha le kitup taha, Christa hung kilah ding ngah jinga umho ding ahi. Paul in hiche kipaman sang ding chu, “Christa hung kilah ngailu chengse” ho ding ahidan aseiye. Hiche kipa man chu, “kinep thannop chule Pathen leng chungnung le eihuhhinguva Jesu Christa loupina hung kilah ding kat jinga um ho” ding ahi (Titus 2:130. Chule van mi ahina he a chua kona huhhinga Jesu Christa hung ding kinema ngah jing ho ding ahi (Phi.3:20). Hitobang hochu a hinkho tonsot a Christa dingin, Colossae 3:1-4 sunga kisei bangin, amangin ahi.

Hijeh chun nangho Christa toh kaithou thaa um nahiule, Pathen jet lama tou jinga Christa umna chung lam thu jengbou chu ha holun. Leiset thu geldauvin, chung lam thu jengbou gelun. Nangho athisa nahiu ahin, nahinnau chu Christa toh Pathena kisela ahi. Ihinnau Christa ahung kilah tengle, amatoh thakhat tah-a nangho jong loupitah-a kilangdoh ding nahiuve.

Hoyt sei dungjuiyin hiche kipa man chonphatna lallukhuh san na dingin chonphat angaiyin ahi. Christa chonphat naa kona kilangdoh chonphat na chu ahi (Rev.3:5; 19:7-8). Huhhinga umsa ho jengin jong hiche kipaman hi achan theiyu ahi.[37] Tahsan chate laha jong mi abang khat chu Demas kisei banga umthei ahi: “Demas tulai vannoi leiset angailut jeh-in keima eidalha tai…” (2 Tim. 4:10). Mi koi tobang Christa ngailua, ahung kitding kinema ngah jing chun hiche vannoi le asunga umho angailu poi. Chule koiman ani in angailu thei poi. Hijeh chun Christa hung kit nading thanom taha ngah jing michun Pathen lungdei lamin hinkho amang jobouve, hite ho ding chun “Chonphatna lallukhuh” chu gotsaa um ahi.

Loupina Lallukhuh

Loupina Lallukhuh chungchang hi Peter in hitin kelngoi ching (pastors) ho henga ana seiye, “Chutile Achingpipa hung kilah teng le nang hon aloupina lal lukhuh chul theilou chu nasan dingu ahi” (1 Pt. 5:4). Hiche loupina lallukhuh chu koitobang hon akhuh ding ham tichu 1 Peter 5:2-3 sunga kon’a hetthei ahi: “Nalah uva Pathen kelngoi hon um ho chu phaten chingphauvin, bol lou phamo tia bol louvin, lung chamin bol’un, alam louva phatchom ngaichatna a jong hilouvin, lung gut tenin bol’un; chule nachanho chengu chunga kipipuisah louvin, ahon chun avettoh a ajui dingujoh-in umin, kaihoiyun.”

Kelngoi ching/pastor ho Pathenin anganse dungjuiya kitah tah-a kelngoi hon ho vah a chingtup chun Achingpipa hung kilah teng loupina lallukhuh asan ding ahi. Kelngoi ching pha chun bollou phamo tin abol poi amavang lung gut tenin, lung chamin chule thanom tahin pan alan ahi. Kelngoi hon chunga chun kipipuisah louvin, ahon in avetjui thei ding johin a lamkaiyin, akai hoiyin, apui hoiye. Hitobang kelngoi chingpha chu Pakaiyin loupina, seiphat nale ja channa, Christa angsunga (bema) tahsan chate thutan niteng apeh ding ahi. Mi tampin hethem louvin, seiset le japi henlang, muset henglang, pahcha hih hel jongle kelngoi chingpha ho ding chun Pakaiyin kipa man loupina lallukhuh gotsan akoipeh’e.

Hinna Lallukhuh

Christa laltouna thutanna anga tahsan chaten kipaman asan dingu, ahoi dehset laha Hinna Lallukhuh hi Thulhun Thah sungin nivei akimin phah e. Hiche lal lukhuh hi Jacob 1:12 in akiminphah masat, “Lhepna thoh ham hama chu anun nom ahi; ajeh chu lhep patepna chu ajoa them achan jou le Pakaiyin ama angailu ho peh dinga athutepsa hinna lal lukhuh chu apehding ahi.” Abanin Revelation 2:10 a akimin phah kit e: “Thil nahin thoh ding ho hi kicha hih hel’in; ven, napatepna a nalah uva mi abang bang chu diabol’in songkul’a akhum ding koncha ahi; chule hesoh genthei ni som nathoh dingu ahi. nangma nathi geiyin tahsanin; chule keiman nangma hinna lal lukhuh kapeh ding ahi.”

Hiche kipa man chu lhepna thoh tun tun a patep na jou ho (Js. 1:12), chule thi chan’a pang a, dingdet ho (Rev.2:10), Pakayin apeh ding ahi. Hiche kipaman hi abang kom le Martyr a thiho chan ding kipaman lal lukhuh tinjong akiseiye. Pakaiyin, hijeh chun, a leng gam’a, Christa jala hesoh genthei thoha a hinkho chan ho dinga hiche kipaman hi gotsa akoi ahi. Hiche kipaman hoitah, Christa jala hesoh genthei thoh ho dinga gotsa um chung chang hi Matthew in hitin anaseiye:

Chonphat jal’a bolsetna thoh ho anun nom ahiuve; ijeh-inem itile van gam chu amahoa ahi. Keima jal’a mihon nahouset’uva nabolset’uva chule nachunguva jouthua thu gilou asei tengule anun nom nahiuve. Kipah-un hapan kipah-un; ijeh-inem itile vanah nasan dingu kipaman atame; ijeh-inem itile nang ho masaga anaum themgao ho jong chu mihon chutobangma chun abolseuvin ahi (Matt. 5:1-12).

THU KHUMKHA NA

Christa Laltouna Thutanaa hi ‘Christa Bema’ tia jong het ahi. Hiche Christa Bema Anga tahsan chate, mipeng thah ho thu bou kitan ding ahi. Tahsan chate thutanna ding chu suhkhel bolkhel aneijeha gotna peh ding hilouvin, ahin tahsan chaten kipaman asanthei ham asan theilou ham, chule itobang kipaman asanthei ding ham tia mijouse anatoh dungjui cheha thutanna ding joh ahi.

Hiche thutanna hi achombeh, thutanna dang to ki banglou ahijeh chun akikhol thuh in ahi. Hiche kholthuh nading chun thuchang kiman dan ho le koiten ipi lampanga iti ana man ham (cultural background) het angai e. Bema hi Greek thuchang akon kilason ahin, akou doh chu “kaltou, chetou” chutia chu mun kido sang khat a kaltou, chetou tina ahi. Thulhun Thah sunga hiche thuchang hi som le ni vei akimun, mun ni Rome 14:10 le 2 Corinth 5:10, hin ahung lhung ding bema chungchang aseilhon e.

Hiche thuchang “bema” hi Greek te golseh le Roman court a ana kimang ahi. Greek nampumpi golnop a, golseh kichem ho vesui ding le kipaman peding ho touna mun chu kisei na ahi. Solchah Paul in hiche “bema” hi chuche khanglaiya mijousen ahetsoh, kumni jouseha um Isthmian golseh vetsah na apen ahi. Hichea goljo na nei michun thingna/thingdo kipheh chu kipaman a akikhuh ji ahi. Chomkhat joule goplhaa kem mang pai ding kipaman le tahsan chaten asan ding kem mang theilou kipaman, akikheh dan Paul in 1Corinth 9:25 a, “Amaho chun lallukhuh kem mangthei lonaa abolu ahin, eihovang kem mangtheilou lalukhuh loa ihiuve,” ana seiye. Rome te “bema” man dan chu ahikit le thutan vaihom ho mun chu ahi. Hiche thutanna mun hinlo ho chu, hiche phatlai Rome te kivaipoh dungjui chun, achungnung pen le aminche pen ho ahijie. Rome te ahin, Greek te ahin, anilhon a “bema” aman dan lhon chu ‘mun ki khangsang, kido sang’ seina ahi, chuleh hichun avetsah chu thil hungkon dohna mun, jabol na mun, chule thaneina mun, hohi ahi.

Christa Laltouna Anga Thutanna, Bema, chu itih hiding ham, aphat ding chu bible in asei dungjuiyin tahsan chate rapture a lahtou jou, leiset a thoh hahsa (tribulation) phatsung, kumsang lenggam hunglhun masang hiding ahi. Thutan na ding mun bible a kona mudoh thei kit chu van gama Pathen laltouna angsung hiding ahi. Thutan ding chu aki thatsa Kelngoinou, Jesu Christa hiding ahi. Chule athu kitan ding chu, houbung khanga tahsan chate jouse ahi.

Tahsan chate thu kitan ding dan chu; Christian mimal hinkho Christan ahinkhol a achonna dungjuiya thu atan ding ahi. Pathenin a nganse na gou ahiloule nei chinga akinganse na chunga jong athu atan ding ahi. Chule anatoh dungjui cheh a ahinkhol a meiya apatep ding ahi. “… ijeh-inem itile nikho ni chun aphondoh ding, hicheni chule meiya kiphongdoh ding ahi, hiteng chule anatoh aset aphat meiyin apatep ding ahi (1 Cor.3:12-13).

Christan tahsan chate thu chutia ahin tan teng mi jouse natoh ase hile apha hile hung kiphong doh cheh ding ahi. Tahsan chate Christa Bema Anga natoh kiphon chung chang hi jatni in aki homkhen e; Negative le Positive. Christan tahsan chate kipaman ahop nikho teng kipaman sang louding a um’e. Lot in Sodom le Gomorah kisuh mang chun anei agou jouse achaanin, ajinu achaan in chule amin (honour) jeng jong achaan e. Chubang a chu tahsan chate jong kipaman chaan ding a umin ahi. Chule Seijui Peter in ahkhon masanga Jesu Christa thumvei aseilep jou chun Jesun aven ahile ajumin, ajahchan, amaimoh in Jesu mai vengam louvin akihei mangin akap e. Chutobang chun tahsan chate jong chuni teng Christa mai vengam louva jum le maimoh ding a um e. Ahin amatah vang huhhingin umnante, meilah pal galkaiya bang ding ahi. Hiche teni hi negative chung chang thua ahi.

Positive chung chang hi jatni in akilhe khen kit e; a lhangpi (kipaman lhangpia) chule a hoi dehset. Alhang pia kipaman ho chu; pachat na, jabol/choiat na, loupina, luttheina, Christa kom luttheina letset, van’a gou, goulo na, chule vaipoh na, hohi ahi.

A hoi dehset hochu ahile lal lukhuh ahi. Lal lukhuh kiti hi Greek pao “stephanos” le “diadema” akon kilason ahi. Akoudoh lhon chu, pahvui/thingdo kithil a lua khuh dinga akola kisem ahi. Akoudoh lhon kilou jongle jatchom chomin akimang lhon e. Stephenos hi sepai hangsan ho ahin, kichen naa ahin, anatoh hoi ho ahin, golseha hat ho ahin, hiti ho chunga kimang ahi. Alangkhat a diadema chu leng le lal te chunga bou kimang ahi. Achom lampena seiding in, stephenos hi tahsan chate chan ding ahin, diadema hi Leng Christa ding ahi. Hichu ahile Christan tahsan chate kipaman apeh ding lallukhuh hochu diadema hilouvin stephenos joh ahi chu akicheh e.

Hiche stephanos hi chi nga a umin ahi.  Kem mang theilou lallukhuh: Hiche stephanos hi atahsa thunun jou, ama kitim them, thenna hinkho mang ho san ding ahi. Kipana lallukhuh: hiche stephanos hi lhagao mangthai huhdoh ho, Jesu Christa henga mi hin puilut ho chule ama taona jal le muchi tu jala, min Christa akimu, hite ho jouse ding ahi. Chonphatna lallukhuh: hiche stephanos hi Christa hung kit nading thanom taha ngah jinga Pathen lungdei lama chon’a hinkho mang ho Christan ahung teng apeh ding ahi. Loupina lallukhuh: hiche stephanos hi Pathenin anganse dungjuiya, kitah na nei taha Pathen kelngoi hon chingtup ho (pastor) aching pipu ahung kilah teng apeh ding ahi. Chule Hinna lallukhuh: hiche stephanos hi lhepna thoh tun tuna patepna jou ho chule Christa jala bol gentheiya um a thichan a panga thoh lhum ho ahilou le martyr a thiho thoukit Christan apeh ding ahi.

Christan tonsot thinaa konin eihung lhatdoh uvin, tun, huhhingna manbeiya eipeh jou nungun, hiche kipaman hohi eigon peh kit uve. John in hichu ahen hitin ana seiye:

Veuvin, Pan eingailutjeu hi itobang hitam! Pathen chate eisah tauve; chule eiho hichu ahijong ihiu ahi. Hiche jeh a chu vannoiyin eiho eihet louvu ahi, hichu ama ahet lou jeh-u ahi. Ngaite ho tun eiho Pathen chate ihiuve; chule ipi ihung hi dingu tun akiphongdoh hih laiye. Ama ahung kilah teng le eiho ama bang bang ihi dingu ahi, ti chu eihon iheuve; ajeh chu ama aum bang banga chu imu dingu ahi. Chule koi hile ama a kinem chu ama athen banga ama jong chu kisuthenga ahi. (1 John 3:1-3).

John in asei kit in, “Hiche lekhabua lhagao thu seidoh ho hi imchah hih hel’in…. Veuvin, keima kahung vah ding ahi; chule athilbol achonna dungjui cheh a lethuhna kapeh ding tohman (kipaman) kakoma aume” Rev. 22:10-12). Pakaiyin mitheng te kipaman ahoppeh teng, nang jong na chang nadem? Na lallukhuh a ahsi chong nan tem?

 

 

End Notes:

[1] Scholar minthang cheh mi 70 in Thulhun Lui Hebrew paova kona Greek paova aledoh’u chu Septuagint kiti ahi.

[2] Eschatology hi Greek paova kon kilason ahi. Hichu khununga hunglhung ding thilho simna/kichuhna, tina ahi.

[3] Mitinin tahsaa athilbol apha hile, ase hile, athilbol dungjui cheh a atohman asan cheh theina dinga, eiho ibonchauva Christa thupi tanna anga chu ikilah cheh dingu ahi.

[4] Ajeh chu Pathen laltouna anga ibonchauva idin dingu ahinalaiye.

[5] Victor C. Pfitzer, Paul and the Agnon Motif: Traditional Athletic Imagery in the Pauline Literature (Leiden: E.J. Bill 1967) p.17

[6] Samuel H. Hoyt, The Jugement Seat of Christ; A Biblical and Theological Study (W. Oklahoma Ave.: Grace Gospel Press) pp37-37

[7] Olympic golseh chu Zeus (Jupiter) pathen ja naa Olympia khopia kibol; Pythian golseh chu nisa pathen (sun god) Apollo ja naa Delphi a kimang; chuleh Nemean golseh chu Zeus ja naa Nemea phaicham’a kibolji ahi.

[8] F.F. Bruce, Commentary on the Book of the Acts (Grand Rapids: Wm. B. Eerdmans Publishing Co., 1954), p.374

[9] Merrill C. Tenney, New Testament Survey (Grand Rapids: Wm. B. Eerdmans Pulblishing Co.1961), P.288

[10] W.J. Conybeare and J.S. Howson, The Life and Epistles of St. Paul, new ed. (Grand Rapids: Wm. B. Eerdmans Publishing Company, 1966), 540

[11] A.T. Robertson, Word Pictures in the New Testament, Vol. IV: The Espistles of Paul (Nashville: Broadman Press, 1931), p148

[12] Eric Sauer, In the Arena of Faith: A Call to a Consecrated Life (Rand Rapids: Wm. B. Eerdmans Publishing Company, 1955), p.50

[13] Victor C. Pfitzer, Paul and the Agnon Motif: Traditional Athletic Imagery in the Pauline Literature. P.16

[14] Samuel L. Hoyt, The Judgment Seat of Christ; A Biblical and Theological Study, p.40

[15] E. Norman Gardiner, Athletics of the Ancient World (Oxford: Clarendon Press, 1930) p.33.

[16] Samuel L. Hoyt, The Judgment Seat of Christ; A Biblical and Theological Study. Pp.41-42

[17] “Games,” The People’s Bible Encyclopedia, 1921, p.395

[18] William Taylor Smith, “Games,” The International Standard Bible Encyclopedia, 1955. Pp.1172-1173

[19] C.I. Scofield, ed., The Scofield Reference Bible, p.1212

[20] Merril F. Unger, Great Neglected Bible Prophecies (Chicago: Scripture Press Book Division, 1955), pp.118-19

[21] Robert Glenn Gromacki, Are These the Last Days? (Old Tappan, NJ: Gleming H. Revell Company, 1970), P.157

[22] Samuel L. Hoyt, The judgment Seat of Christ. P 55

[23] E. Schuyler English, The Church at the Tribunal (Old Tappan, NJ: Fleming H. Revell Company, 1968), p.25

[24] Samuel L Hoyt, The Judgment Seat of Christ, p112

[25] http://biblehub.com/greek/3623.htm

[26] G.Campbell Morgan, Studies in the Four Gospels (Old Tappan NJ: Gleming H. Revell Company, 1931), p 241

[27] W. Graham Scroggie, What About Heaven? Comfort for Christians (London: Pickering Ltd.), [109

[28] J Dwight Pentecost, Prophecy for Today: An Exposition of Major Themes on Prophecy (Grand Rapids: Zondervan Publishing House, 1961),  p158

[29] Rene Pache, The Future Life (Chicago: Moody Press, 1962), p237

[30] Mason, “A Study of Paulin Motives as Revealed in 2 Corinthians 4:16-6a,” p220

[31] Samuel L. Hoyt, The Judgment Seat of Christ; A Biblical and Theological Study, Pp149-177

[32] Jabol/choiatna hi japi maiya phondoh ding ahi alangkhat a seiphat nachu mipi angsung jong hithei chule achangval a jong hithei ahi. Mi khat jabol nading chun, akija bol na ding mipi angaicha e, achanga kija bolthei lou ahi, seiphat na vang achang a aumpeta jong seiphat thei ahi. Hitia chu jabol nale seiphat na chu hetkhen in aphai.

[33] W.E. Vine, An Expository Dictionary of New Testament Words with Their Precise Meanings for English Readers, II, (Westwood, NJ: Fleming H. Revel Company, 1940), P.7230

[34] Joseph Henry Thayer, Greek-English Lexicon of the New Testament (Grand Rapids: Zondervan Publishing House, 1962), p.623

[35] Thayer, Greek-English Lexicon of the New Testament, p.587

[36] Ibid. p.136

[37] Samuel L. Hoyt, The Judgment Seat of Christ; A Biblical and Theological Study, p.174

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s