img-20131219-wa0045

Ollha (Dec.), imalam jousea ol’na lha chu ahung lhung kit tai. Mitin lung kipanan adim’e.  Ijeh-inem itileh kum hung lhung kit ahitai. Adehin Christmas anai tah jehin, iki pah dehset uve. Ahin geldi khat chu; Christmas ipi ham? Kumseha aki man hi ajeh ki he’a hinam? Kum seha iman lo na jeh’u isuh mil khah um?

Eihon alhangpin, Christmas hi saa neh khom na; lenkhom na; bazar kai na; abong loi khat chun sports; thil dang danga a ki salel’un ahi. Christmas hi, hiti monga man ding hi tam? Idia tuni chan’a koiman thuchung Christmas chu ka phat chompi lheh e, lhagao khantou nan ka neiye tia sei kija kha lou ham?!

Suhmil lou ding/het masat ding khat chu Christmas hi Bethlehem bongbuha hung kipan hiponte. Eden hon’a hung kipan peh joh hiding dan ahi. Pathen in Gen.3:15 a Adam le Eve Chonset’a  alhah jou lhon chun, “…Ama pa (Jesu) chun nangma (Satan) luchang a voh chip ding ahi…” tin ana seiyin ahi. Hitia Pathenin ana gon mihem chonseta alhah jouva, lungset mana huhdoh kit dinga ana gon chu kum sangni (2000) masang chun Bethlehem Bongbuha Pathen amatah eiho lim le mel’in, ei ho lhatdoh dingin ahung pen tan ahi. Hiche apenni chu (ani kho chet mong hihih jong leh) Pakai penni Christmas tia imanu ahi.

Christmas hi Pakai penni ahi iti tauve. Chuleh kakho het’a pat kahin ching jingkhat chu, Christmas ni jingkah khovah chipchep/thenthen leh kanu le kapan pucha sunga thilpeh, innsunga kanei kham khamu alakhom jilhonin hichu choiyin houina/hall’a ache jilhonin naosen agave ji lhon’e. Eihon jong iloi le golte birthday a iche ji tengu thilpeh (birthday gift) i-choi peh teiyun iche jiuve. Ahile tukum Pakai Penni Christmas iman kit diu ahitan, ipi thilpeh (gift) pehding na got em, i-Pakai apen (Birthday) nikho leh?

Thilpeh lenpen!

Kum phabep pi ache tan ahi, 1994 kum chun America gama kon missionary ni, Russia gama ana che lhonin ahi. Pathen thusei dingin orphan home numei le pasal agoma mi 100 vel umna  khata ana kou uve. Christmas nikho hin amanin jong Pakai Jesu pen dan chu ahil lhon tai; “Chuin hiti ahi, hiche lai chun Caesar Augustus chun leiset chung cheng jouse min sut ding thu apen ahi…. Hichun mi jouse chu amin sun dingin ama ama khopi cheh a acheuvin ahi. Chule Joseph jong chu David inko le aphung ahijeh chun Galilee gama Nazareth khoa konin amin sun dingin, aajihol Mariam gaihamset chutoh Judea gama David khopi Bethlehem atiuva chun achetan ahi. Chuin amani chukoma aumpet lhonin Mariam aso phat alhingtan ahi. Hichun achapa masapen ahingin; chuin pon’in ajel’in jinlhun in a mun a on loujeh chun gan ankong sunga alup sah tan ahi (Lk.2:1-7), tin ahil lhon’e.

Hitia ahil chen jou lhon chun, chapang ho chu cupboard/board khat cheh a pe lhonin naosen gan ankonga um lim asem diuvin ahil lhon tan ahi. Chuleh thil angai cha ho (materials) jong a pe sohkei lhon’e. Hiti chun chapang ho jong chu kipah tah le thanom tahin gan ankong sunga naosen um lim sem chun abui cheh uve. Missionary teni jong a lah uva chun avah le lhonin, chapang ho thil sem chu a vesui le lhonin ahi. Missionary khat pan chapang ho laha khat thilsem amu dohin, kidang jong asan, alung jong a dong tan ahi. Hiche chapangpa chun gan ankong sunga chu naosen ni (two babies) jen ana lupsah ahi, chapang dang ho chun la khat khat cheh, dih chetin akoi sohkei naove. Chuin chapangpa koma; idia naosen khat hilou, naosen ni jen a koi ham, ole ahet chetlou ham, tin nem heuchan adong lhon’e. Chapang pan Pakai Jesu thusim chu khatvei bouseh ajah hijong leh ana hechen ma ma jengin ahi. Hiti chun aban ban chan athusim ajah hochu ahin seiyin, a chai nan hitin ahin seidoh’e, “Pakai Jesun umna ding mun nanei em, ei ti, ahin kin ka donbutin ka nei poi ka ti. Chuin Pakai Jesun ahileh kei koma hin um jeng tangem, ei ti. Kin kasei kitin, midang ho bongin thilhoi, thilpha, thil mantam, thilpeh ding imacha ka nei joupoi, orphan home’a um kahibouve, iti nang koma ka um jeng thei ding ham!” Ahin ka gel gel leh phalbi zaan dap ahi chu kahin geldoh in, kin jong ka pehthei ding pen, “ka lum (warm) sah thei ding ham, tia kadoh leh Pakai Jesun heng e, hungin kakom’a, eitin ahi.” Hijeh a chu gan ankonga kei jong ka na lut ahi, hiche jeha chu naosen ni um ahi. Khat Jesu ahin, khad kei ka hi. Chuleh Pakai Jesun a seiyin, tuni bou hilou in tonsot tonsota keikom a na um jing ding ahi, ei ti. Chuin chapang pa chun akhut  teni akil ton, aboh khup in, amai tola asulut in, akap tan ahi. Hiti chun ama tah jong Pakai Jesu din aki phal thengin, ahin kho a pe tan ahi. Sei jou hoi hilou a thil peh jehin Pathen chu thangvah in um hen (2Cor. 9:15).

Nang le kin ipi thilpeh ipeh ding ham, I Pakai, a penni leh? Iti-lampanga, ipi na peh dingham? Nang le kei in jong tunin, tu chungin, phate chan gelpha kit hite. Huhingpu a na ki sanlou lai hileh, tuchung hi phat ki lem petcha ahi. Nangin jong alen pen le aman tampen na hinkho na pehding hi, Pakai dia lunglhai le dei umtah ahi. Tuchung Christmas hi, saa neh na; bazar kai na; sports; lenkhom; etc. tiho mai mai a mang louvin, ei hon jong thilpeh lenpen leh man tampen i-hinkho’u hi pe chehu hiute.  Chuleh a hinkho ana pe sahon jong, kisuh det naleh aban kalson be nan nei tei ute. Hiti hin Christmas aki man lo na le athupi je sumil pou hite. Christmas poima le Pathen thil goun loupi hichu Van Lal Nao, nang le kei ngailut behset jeha kiidah umtah leiset’a, Bethlehem bong buh namse laha, phalbi zaan dap thoh a ahung lo na jeh hohi sumil poute. Laa in jong isa jiuve, “Van khopi ten it jong leu, nang jong deh lou’u”. Van khopiten a it un ahin sol nom pouve, ahin Vankhopite it na sangin eiho ei-ngailut nao alet joh jehchun, genthei hesoh thoh ding hijongleh, nang le kin tonsod hinna i-nei thei na din, a hinkho pe dingin leiya ahung peng tai. Ahin, vangsed umtahin mi tampin Christmas a aboipi pen chu, hichu ana hi ji poi. Chusangin, tot a nui na; kichep golseh; saa neh na; bazar kai na; etc. ho joh ahi ji’e. Hiti chun Christmas akiman lona jeh leh aloupi dan he louvin i-um gamtaovin ahi. Ahin tukumin nang le kei in vang midang ho bongin nop chon nale, tahsa lam leh thil dang dangin mang louvin, hiche chapangpa bong chun i-hinkho’u Pathena pejoute. Tukal a patin gan ankong a naosen khat hi talouvin naosen ni joh umsah taote, Jesu koma eiho jong um taote.

Hiche chapangpa, ahinkho Christmas nia ana pepa bonga hetchet angaiyin ahi. Eihon jong huhhingpun ki sanin, hinna chu nei cheh ute. Ajeh chu eiho chonset khela thi chu Jesu bou ahi. Hijeh chun tua konin gan ankonga naosen ni (khad Pakai Jesu chule Khat nang) um jo ta hen. I-hinkhou hi Pakai Jesu’a  i-um uva, ama eihoa aum angaiyin ahi. Hiche na dinga chu i-hinkhou iki peh lhahu ngai ahi. Akhuti lou leh kumdang bonga tukum Christmas jong panna beiya che mang kitding, saa neh na; chadon na; lenkhom na; kichep golseh; etc. na bepseu hikit ding ahi. Hitia chu kumseha iman’u Christmas hi ajeh helouva, aloupi dan he louva, hung ji ji a, che kit ji ji bepding ding ahi. Ven, Na hinkho Pakai dinga na peh ding chu Christmas thupi le akiman lo na, ajeh pen tah chu ahi.

.

                        Christmas Chibai!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s