Kum hung lhung kit ding ahitai. Tong le cholte dia kinepna “kumlhun” ahung naiye. Chuto lhonin mitin kinepna “Chritmas” jong ahung nai tai. Ahin tulai khantou dungjui’in Christmas ngalalna ho, kinepna ho hi adai cheh chehin akilang’e. Chugoh hilouvin eiho lah jenga jong Chritmas kiman hi bible toh kikal’a sei jong aki umda tapoi. Vangset umtahin Pathen tahsan cheh hijong leuhen tahsan dan chom chom inei tauve. Pathen oi kihe cheh jong leh tahsan na’a chena lhongpi jong achom cheh ineiyui. Christmas chungchang jenga jong tahsan dan jat chom chom ineigam tauve. Bible a Chrsitmas man ding thu aki seipoi. Christmas hi pathen helou hoa kon (pagan origin) kila son ahibouve. Chritmas tree, santa clause abona pathen helou ho chon le khan (pagan practices) ahi. Among mongin Christmas hi Babylonte chondana kon kila son ahibouve, tia sei jong aki umda tapoi. Bible injong Christmas kiman aphatsah lou kicheh tahin aseiye, vetsah nan, Jeremiah. 10:2-4, “Pakaiyin hitin aseiye, “Namtin vaipiho lamlhah chu kihil them dauvin lang… Gammang la a thing phung…”

Isaiah 44:14-15, “Aman Cedar thing ho  chu aphuh lhun, kheng thing ham ganpi thing ham alhengin hiche chu gamchang thing ho…”

Chule Jeremiah 3:13, Thingna eng noi tin a na deichat jouse Gamdang mite laha…” tin aseiyui.

Atah mongin Christmas iman dan uhi Pathen hou lou ho chondan, um chan tamtah toh ikop tauve. Masanga Rome’te Saturnilia tia kihe golnop/kumhei chu ni sagi (7 days), 17th – 24th December chan “kipana pe lhagao” (spirit of merriment) tin, chapang ho thilpeh le thil dang dang hon, nomsa tahin ana mang jiuve. Phat ahung chechen ol ol’in hichu Christian masa hon Christmas joha man dingin ana khel doh tauve.

Thilpeh kipeh dan hohi Rome’te chondan khat anahi; “Yule” hi masang Teutonic’te hou  umjing khat chu ahi. Khonungin, hichu Christiante laha ahung lut’e. Hiche chondan chu 1555 kum in council in ana jahda in; ahin Reformation lai chun hichu thah sem phatin Christmas kiman na’a Christian lam joha din ahin heidoh uve.

Pathen helou (pagan) hon abol’u tichu “candle vah”, “thing eng decoration” chuleh “thilpeh (gifts)” ho vel khu Christianten jong ila son uve. Europen Sahlam, Celtic, Teutonic le Slavic geiya Christian ahung chaltoh lhonin winter festival (phalbi golnop) chu holly (thingdo eng), mistletoe, Christmas tree, bonfires, le adang dang, hung kimang cha pan ahi. Hiti chun namdangte chondan hohi Christiante laha ahung lut’e, adeh in Christmas kiman nan aha kilang deh’e.

Ahin eihon Chritmas iman teng uleh hiche ho dinga chu kimang ahi poi, milim doi ho gel louvin Pathen lamjoha kimang ahijoi. Vetsah nan, eiho hapta sunga nikho min ho jong hi Pagan ho pathen min/tahsan a kon kila son ahi. Thursday hi German te “keh (thunder god) pathen” min. Tuesday hi “Tiw” kiti “gaal pathen” (god of war). Chuleh Wednesday hi “Woden” kiti pathen, German te tahsan lentah khat ahi. Sunday le Monday hi “Nisa le Lha” houna toh kisam kai. Saturday hi “Saturnus” or “Saturn” a kona kila son, chuleh Friday hi “Fri” kiti “goddess of love” akon kila son ahi. Ahinla hiche ho jouse tahsan nale ajeh hohi tun akimang cha pon chuleh geljong aki geldoh peh poi. Vetsah nan, Friday nikho teng “Fri” goddess of love aki gelpoi. Saturday nin jong Saturn’s nikho’n aki gelpoi. Hibanga chu Christmas tradition jong chuti ma ahi. Min haptasunga nikho min holeh Christmas jong masanga atahsan nau le anit dan bangin nit taleh, henge hichu adihlou ahi. Ahin hiche ho jouse chu koiman akigel pon, hiche jeha jong chu kinit jong ahi tapoi. Sunday nibang chu Pathen hou na, Houin kaikhom, Pathen thu kihil na nikho johin aki mang jobouve. Hibang chun thing phung kimang chun Christa, Pathen chapa tonsot hinna mihemte dia apeh thing a kon, hichu “cross” vetsah na ahung hijo tai (Rev.2:7; 22:2; 14). Christmas tree noiya thilpeh lim kikoi hochun, Pathenin eingailud jeh uva achapa changkhat eipeh’u geldohna jong ahi kit’e.

Chunga kisei Bible chang, Jeremiah leh Isaiah akon pansatna jong khu Christmas thutoh ki sam kai lou ahi. Hiche thing ho a kona milim sem’a hou chu adem nale gihsal na joh ahi. Milim doi hou chungchang thua kisei ahi joi. Jeremiahin chunga nisa, ahsi, lha etc. houho akon’a gihsal nale gahna apeh, chuleh gam laha che a thing phuha hiche a kona milim or salim or thil lim dang dang sem a, hiche lim anga bohkhup a hou, lamhil ding, huhhing ding, leh phatthei boh chan na dinga tao chu agihsal joh ahi (Isaiah.44:14-17).

Alang khata Khang masa miten Pathen thu dihtah chu ana man khel joh’u ahi. Christmas chondan atamjo hi gollui Khanga Babylonte johin tampi hi ama ho pathen houna  chondan’a ana lah son joh’u ahi. Ahin adihtah leh atahpa chu ana  mangkhel uve. Chuleh Christianten Babylonte pathen hou dan le chondan alah’u ahi tia kisei chu adih tahin Babylonte johin Christiante, Bible a thu ho joh akaleh or adih louva ana man johu ahijoi. Ajeh chu achon danu le apathen hou dan’u, Bible, OT’a kona che khel ahidan’u aki lange. (Vetsah nan, Genesis 3:15, numei nu chillhah a kon’a huhhing pu hungpeng ding. Isaiah 7:14 Huhhingpu nungah thenga kona apen ding kitep. Bible mun tampin Messiah’a hinna chu thing (tree) vetsah na (symbol) aman chah. Genesis 2:9; 3:17, 22; Rev. 2:7; 22:2,14 hinna thingphung thu aseiye. Isaiah 4:2; 11:1; 60;21 Jerememiah 23:5; 33:15 leh Zechariah 3:8; 6:12 Pakaiya kona abah jamdoh chu Pathen natoh ahi dan aseiye). Hiche bible chang hohin Pakaiya kona hung jamdoh, atoi hung dondoh thingphung, Israelte le nam jouse dinga hin thing ahung hi dingdan aseiye. New Testament lang ivet leh hiche hinna thingphung/hinthing chu Christa Jesu’a akimui.

Atil abul a Pathen ngaisah lou miho chu Satan’in aman chaha ahilou lam tah le ase lamtaha ana man chah sah joh ahi. Vetsah nan, Babylonte chondan khat “the mother-child cult” tia kihe ahou pen uchu achapa hilouvin anu joh ahi. Hiche hi Genesis 3:15 a Pathen thutep asuh setnau (distort) khat ahi. Hiche chondan abol lo na jeh pen tah uchu, mihem’in angaichat pen thutah (truth) le huhhingna ngaichat jal ahi. Adih lou lam tahin ana mong jong leu hiche hochun avetsah chu huhhingpu, tonsot hinna, numei nu son’a kon, Pathen thilpeh, van’a kona abah hung kailha, hiche ho lungput chu ahi. Hiche ho chu tahsan umlou tahin Pathen thugil chu alampi aho thou uve. Ahin Noah khang twisang leta leiset kisuh mang thusim leh  mihem chonset a alhah, etc. thusim hobang chun chonset nan alon khum un, Pathen douna johin abol jo tauve. Ahin alangkhata adih lou lamtah hita jong le adoi ukhun adihpa (original) Pathenin ana peh pa lamjong anga thouve. Atil abul chun adihpa Pathen thu pahi ana man’u ahijong bailam tah ahi. Tulai eiho Chritmas man dan hin hiche pagan, Pathen helou ho chondan hole ajeh ho chu kiman saha, kiche pi lou ahi. Alangkhat a amahon ana suhset pau chu  Pathen thu’a kona mimasa hon ana semtoh uva ana bol phat joh’u ahi tai.

Bible in atah mongin Christmas man ding asei poi (Jesu ahung peng monge tivang kicheh tahin aseiye, Gen.3:15; Is.9:1-7; Micah 5:2; Matt.1-2; Lk.2).). Hijongleh, Christa lungsed na noiya chamlen ihi jehun, Christmas man na ding jong chamlhat na ineiyui. Chujongleh Christmas manding Bible in asei lou bangin akiman hi ajah da na jong asei deh poi. Milim hou na’a saa kine chu ima aset na aum lou bang chun Christmas kiman na’a Xmas tree, gifts/presents, carols le decorations kibol hojong asetna ima a umpoi (Rom.14:22-23; 1Cor.4:4-8; 10:19). Ahin tulai in company ho leh offices ho titah louvin khosung vengsung jenga jong mi tampin jule sa’a party bolin amang tauve. Aki man lo na jeh huhhingpu pen chu agel pha pouve. Chapang ho jeng jong vonthah thah le thil thah thah, deiyin Huhhingpu hung pen thu mong mong aja kha ta hih uve. Huhhingpu hungpen gelpha talouvin, pagan hobangin, golnop, sports, totna, saneh khom hojoh ikhohsah jotaove. Hitobang hojoh chu ahi Pathen thun adei lou chu.

Thuchaina: Christmas kimang hi adihpoi natileh manda jengin, ahin amang ho seiset le muset vang bol hih in. Christmas tree, Santa Clause, gifts, decoration, etc., adih poi na ti le boldan, ahin Huhhingpu ahung pen monge ti vang sumil lou jen’in. Christmas tree, presents leh decorations ho bola pha na sah le phatahin bolin ahin Pathen helou (pagan) ho bol bangin boldan. Adeh in Christa Jesu nangle kei lhat doh dinga, lei mihem’a hung peng ahi tichu hejingin. Chuteng chu ho chu ahilchet na’a naman thei ahi; vetsah nan,1) thingphung (tree) chun Pakai Jesun tonsot hinna thingpela eipeh dan u; 2) thilpeh (gifts), Pathenin ei ngailut jeh uva achapa changkhat eipeh dan u…etc. Chuleh Old Testament khanga Kalchuh Kut teng Israel ten achateu Pathenin thahhat taha Egypt gama kon’a ahin puidoh dan u ahil banguva chu, eihon jong iji, icha, isopi, loi le gol henga Pathenin chonseta kon’a eihung lhat doh diuva, lei mihem’a ahung pen dan kihil na’a man thei ahi. Eima innsung le midang dinga ngailut vetsah na phata jong mang thei ahi.

 

Tunvang Kumseh’a Iman’u Christmas hi adehlou hikha hitam tia lungboina umta loudin tahsan ahi!

Christmas Mang Jouse; Christmas Chibai!

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s