Hiche chun amahon akaiyun; chuin athingpel akiput’in Lugu mun atiu, Hebrew paova Golgotha atiu mun chu jonin achedohtan ahi. Hikoma chun ama (Jesu) thingpel’ah akhenbeh-un… (Jn.19:17-18).                                                                                   Thingpela mitha hi Persia ten ana pohdoh u ahi . Rome te vaipoh masangin jong Phoenicia, Carthage le Egypt hon ana bol uve. Persia te chun “leiset”, “mei’ chule “twi” hohi athenga (sacred object) a nei u ahi. Hijeha chu dan palkeh ho chu leiset tongkha louva thinga akhailih jiu ahi. Khonungin hichu jat chom chom in ahin chepe un, adeh in Rome ten aha chepi deh uve. Pakai Jesu phatlai, boina sang umjingna mun Judea gamkaiya ana habol deh uve. Josephus (1st Century Romano-Jewish scholar) chun, Herod the Great thinungin, Syria gamkai’a Rome governor, Quinctilius Varus in mipi kiphin sousang hochu mi 2000 jen thinpela athat e atin ahi. Chuleh Rome lengvaipo Titus in AD 70 a Jerusalem alonkhum chun mihem ana ha khailih val jehchun mikhai nading thing le mun ong aumlou dan jong asei’e. Christa phat sungin, mihem 30,000 tobang Judea gamkol sunga ana khailih un ahi. Mithi thing chunga/thingpela mithi kikhai tiho chu Jerusalem gamkol lah ding chun angai na tobang chuleh Rome te khan gitloudan hetna khat jong anahi.

Thingkil ana man uchu tulai thingkil ho tobang hilouvin, railroad a kimang ho tobang thih among lam hem ahi. Jesu chu akhut phanga akhet beh uham akhut chonga akhet beh uham tihi miho tahsan dan jatni aum’e. Khut phang a kikhet beh chun khut akai keh in tahsa akhai jou poi. Ahin khutchonga kikhet beh chun tahsa apojou/akhai jou e. Chutia khut phanga kikhet beh ahile aban chu khaova thingtoh kan kop unte. Thihkil kikhet lut chun nasa tahin anat sahin, ahin thina ding vang ahi poi. Chule thingkil khata akeng teni akoikop uva thingtoh akilmat’u ahi. Chutia thingtoh akhet beh jou teng ule sepai hon akhom ko’a chu angap uva atundoh jiu ahi. Akhom akitung doha ahung kita teng tahsa pumpi chu aseiji beiya na ahi. Hiche jeha chu Psalm 22 in Pakai thingpela athoh ding chu gao a ana seimasat, “ Kei hi twi kisung lha banga eikisung lha ahitai, kaguchin kachang chin akikhensoh ding ahipaitai,” (v.14) ahi.

Rome techun thingpela iti kibol le nat athoh lal chom diham ti athemun chule nat thohgim na chu iti suhsao ding ham jong ahe’uve. Chule kho helouva aum uva anat thoh ahaimil louna dingun jong abol jiuve. Thingpel a kikhen beh hochun, anat behset jeh chun titho, khosih, lohso, dangchah, gule chang chi le chidang dang ho athoh u’ahi. Imut theilou, gilkel, dangchah (dehydration) chule maha jouse chun asal’a hitia chu nithum/nili athoh jiu ahi. Kihol lalna dimset, jum le maimoh, chule nat sat naho jouse puma kikhai ahi.

Gamvaipo Tiberius chun gotna kipe laha thingpel hi ana deisah e, ajeh chu thipai pai a nat heman lou hilouvin, sot tah genthei taha nat athoh’a thi ahi. Tiberius ngaito chu ahile akithat paichu panna bei ahi, athi masanga nasa taha athohgim loule gotna chu mohseh ahi.

Thina chu oltaha ahaikhop louteng hung ji bou ahi.  Dipkong (diaphragm) achah kheh theina dinga tahsa chu thinga kikhai ji ahi. Hai thei na dinga khup teni anuhtou ding chutia chu dipkong chu neokhat hung chat theiya haina hu ahin peh thei ahi. Achaina le agimval behset teng tha lhalop soha khup anuhtou joulou teng haina hu lhasama ajonale thiji bep ahi. Louthem Dr. Truman Davis in thingpela kikhetbeh ho chungchang lampanga kholgilna nei chun Jesu kikhetbeha aum didan hitin ana seiye:

Akikhaina ban tha lhalhop sohin, atahsa pumpi nalha jengin, kikanchom bangin, nasatahin amaha ho chun achip’e. Chutia agim behset tah jehchun akinuh tou jou ta pon ahi. Akhuta kikhai ahi jehchun a oplhang jouse chun kho ahe tapon chule nahguiya thajung hojong amoden tan ahi. Hui chu ahailut thei nan ahin ahaidoh thei tapoi. Jesu Christa chun akhonna ding chun khatvei kinuh touva haidoh ding agon ahi. Chuin carbon dioxide chu achop (lung) le athigui jousea adim joutan (ahai doh thei lou jeh chun) ahile anat chu a oldeu’e chuin nahchang salin akinuh tou jouin hinna kham hu aki joplut e…

Akinuhsuh akinuhtou jehchun akikhaina thingin ahetkeh peh na maha hochu achom behin ahung na doh kit e. Alangkhata lungchang chu thisan goden hon ahintom chah phat chun nasa tahin a’oplah anat sah kit e

Tun akichai konlam amano tai –  thisan kang/twilhi ho chu abeisoh tan, lungchang jong thisan goden hon akan chom jeh chun, asan (thick), agih tan, thisan apeh di doltah in ape jou tapon, chop (lung) jong hui (air) khatvei cha hijong le hoplut tei ding agot vangin ajou tapoi. Chule a tui lhawhdoh (dehydrate) val jehchun lhoh (brain) lang ana pha tai.[1]

Chutia kengtha abeiya kho ahet lou teng haina dinga kinuh tou joulou ahi tan chuphat le gangchela thi pai jiu ahi. Hiche jeha chu Rome ten aphat asuhchom nom teng ule “crucifracture” – keng veiboh abol jiu ahi. (cf. John 19:31).

Dehydration, hypovolemic (thisan che talou) chule lungchang ahina ding dola chat thei talou, hiti ho jehchun I-Pakai Jesu chu, Louthem Davis seibangin, ana thi tai.

Hibang genthei hesoh thingpel chunga nat hijatpi athoh laijin, Pan (Pathen) ahin ven ahile Chapa Christa, chonset na neilou chu eiho chonset apoh jehchun, chonset bou amu tan ahi. Pathen chula atheng ahin, chonset vetheilou ahijeh chun a Chapa jengjong ana dalha tai. Hichun Pakai chu hitobang genthei athoh laijin ahuding koima umlou, Pa jengin jong adalhah phat chun aman jong aw sang tahin, “Eli, Eli, lema sabachthani,  Ka Pathen, Ka Pathen ibola neilha hitam (Mtt.27:46),” tin lhase tahin ana kap e. Hiti chun vannoi chonset jouse po in thingpel chunga alongtohin namtin alhat doh tan ahi. Chutia chonset gaal aso joh phat chun, “Akichai tai, Ka jousoh tai” tin Greek paova Τετέλεσται, (Tetelestai) atin chuin akaikun alhagao alhadoh tan ahi (Jn. 19:30).

Application: Sopi, huhhingpun genthei hesoh le natna hijat athoha along ato leuchu nang le kein tonsot “hinna” inei thei nading ahi bouve. Hitobang pihi nahsah louva na umle ahung kit niteng “themmo” na chan lou ding ham!?

[1] The Crucifixion of Jesus: The Passion of Christ from a Medical Point of View,” Arizona Medicine, vol. 22, no. 3 (March 1965), 183–87.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s